قطر المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
Aqeel11311
13-12-2022 - 03:41 pm
ألتمست الكرم والطيب من منتداكم والأعضاء المتواجدين ، مواضيع روعة والأعضاء أروع .
إن شاء الله بتكون لي زيارة لدوحة قطر الأسبوع القادم لمدة يومين ، علما أنها الزيارة الأولى لي لقطر الحبيبة ، طبعا مع زوجتي وراح يكون عيد زواجنا .
ارجو من أحد الأخوان ترتيب جدول لمدة يومين يشمل ( فلاجيو ، اللؤلؤة ، السيتي ، اللاند مارك ، سوق واقف ، الحي الثقافي ) طبعا حسب ترتيب الأماكن وقربها من بعض ، وإذا ماعليه أمر ( اللي راح يرتب لنا ) يكتب التوقيت للزيارات .
شباب هذا أول موضوع لي ولاتخيبوني .


التعليقات (9)
عبدالله منصوري
عبدالله منصوري
السلام عليكم أخوي،،
ربي يعطيك العافيه إنشاءالله، المهم راح بحتاج إلى أوقات الوصول والمغادرة ومكان السكن لو سمحت،،
على العموم هذا رد مبدئي مني لك لحين وصول باقي المعلومات (باقي الاعضاء راح يساعدونك بعد)،،
اليوم الأول:
  • تقدر تزور في فترة الصباح المتحف الاسلامي. (يفتحون من ساعه 9 تقريبا لغاية 5 المسا)
  • بعدها تمر على السيتي سنتر تتغدى هناك وتدخل السينما
  • فترة المسا تتمشى في جزيرة اللولوه بعدها الحي الثقافي وممكن يكون العشا بعد هناك.

اليوم الثاني طال عمرك:
  • فترة الظهيرة تطلع لك على فيلاجيو مول (الغدا هناك وتغيير جو)
  • فترة العصر عندك جنب فيلاجيو حديقة اسباير وممكن تتمشى فيها لين قريب المسا
  • فترة المسا تنزل على سوق واقف وتتمشى وتتعشى وتقعد لك في كوفي شوب
  • وممكن تتمشى على الكورنيش بعد

وطال عمرك بهل الشكل يكون يومك خلص (وأي خدمة ثانية حاضرين لك)

the ro0ok
the ro0ok
جدول اخوي عبدالله الصراحه وايد مبهر ومرتب وانا اشوفه حلو للعرسان وخصوصا الحي الثقافي والؤلؤه احسن مكانين رومنسيين مع الاجواء الرائعه
طبعا انصحكم بالعشى انتي وزوجك في الؤلؤه اختاروا المطعم الي يعجبكم

Aqeel11311
Aqeel11311
وعليكم السلام ورحمة الله ،
الله يعطيكم العافية إخواني وماراح أنسى خدمتكم .
طبعا بالنسبة للسكن راح يكون في فندق هوليدي فيلا ، اللي ماأدري وين يصير
، بس اللي فهمت من المنتدى أنه بعيد بالنسبة للأماكن السياحية ، الوصول راح يكون على الساعة 9:30 والمغادرة اليوم الثاني في العصر .
ماأدري في وقت نمر كل الأماكن المذكورة ، ونسيت بعد أضيف حديقة الحيوان
.

النوريq
النوريq
أنسى حديقة الحيوان
مافي وقت وأنا باسوي لك جدول يناسبكم
أول شي بتوصلون الصبح ولين ماتخلصون من المطار وتروحون الفندق بيكون الوقت ظهر
عقب ماتخلصون شغلكم في الفندق اطلعوا على فيلاجيو وتمشوا فيه وتغدوا وادخلوا السينما إذا تبون
وعقبها العصر روحوا جزيرة اللؤلؤة وحوسوا فيها
وعقب المغرب روحوا الحي الثقافي لانه قريب من اللؤلؤة ،، وتمشوا فيه وإذا يات حزة العشا تعشوا هناك
الحي فيه كذا مطعم بس أنا أرشح لك مطعم زعفران
اليوم الثاني روحوا سوق واقف تفطروا هناك وعقب ماتخلصون روحوا سيتي سنتر تمشوا وتغدوا
وتقدرون تعكسون المخطط وتروحون سيتي سنتر في البدايه وعقب تروحون سوق واقف وتتغدون
عقبها طبعاً على طول روحوا المطار

Aqeel11311
Aqeel11311
الله يعطيج العافية أختي ~ النوري p ~ خدمة ماراح ننساها .
طبعا جيتي ماراح تكون طيران ، بسيارتي الخاصة ، جاي من السعودية ( الأحساء ) .
تامرون على شي من عندنا؟؟ ترى حاضرين .

النوريq
النوريq
aqeel11311
مانبي إلا سلامتك أخوي
بس بكم طلع عليك الهوليدي فيلا ؟؟

Aqeel11311
Aqeel11311
الله يسلمج ويعافيج .
طلع علي ب 780 ريال .

the ro0ok
the ro0ok
^
^
0!!!!!!!!!!! too much
كم غرفه لانه اذكر ايام قبل غرفتين ب 550 ايام قبل يعني يمكن شهرين او اكثر شوي

Aqeel11311
Aqeel11311
جناح ( غرفة وحدة وجلسة ودورة مياه وأنتو بكرامة )
جا ف بالي أغير الفندق ، بس المشكلة إني متفق معهم على ترتيبات معينة وهم جهزوا كل شي ، طبعا السبب في فكرة التغيير هو بعد الفندق عن الأماكن السياحية وأخوك أول مرة يزور قطر ( يعني مايدل شي )


خصم يصل إلى 25%