هلا وغلا أختي هديل
تنورون قطر بزيارتكم
بالنسبة للفندق فأنا أرشح لج فندق الشيراتون
والفندق فخم وراقي وموقعه ممتاز وكل شي قريب حذاه
قريب من الكورنيش وسوق واقف والمتحف الإسلامي والسيتي سنتر والحي الثقافي وجزيرة اللؤلؤة
وهذي أشهر الأماكن السياحيه في البلاد
ولو تبين فندق ثاني عندج الريتز وهو قريب من جزيرة اللؤلؤة والحي الثقافي
وبالنسبة للسينمات فأنا أرشح لج أفضل السينمات اللي هي سينمات سيتي سنتر وعقبها سينمات فيلاجيو
السيتي سنتر فيه 14 سينما
وفيلاجيو فيه 13 سينما
ال vip اللي في سيتي سنتر أرقى بمليون مره من فيلاجيو وسعرها 100 ريال
وال vip اللي في فيلاجيو سعرها 45 يعني زيادة عشر ريالات عن السينمات العاديه
والفرق ان ال vip اللي في فيلاجيو يكونون في دور ثاني مستقل في السينما
واللي حاجزين تذاكر عاديه يكونون موجودين معاهم في نفس السينما بس تحت
أما سينما ال vip اللي في سيتي سنتر لهم سينما خاصة منفصلة اسمها vip gold
وبالنسبة لل shopping عندج مجمع السيتي سنتر وفيلاجيو واللاند مارك
وفي فيلاجيو قسم خاص حق الماركات العالمية مثل ديور وغوتشي ولوي فيتون وغيرها ،،
وأيضاً عندج جزيرة اللؤلؤة جزيرة حلوه في البحر وفيها بوتيكات وقهاوي ومطاعم وقعدات حلوه على البحر
وأيضاً عندج الحي الثقافي حلو وفيه مطاعم ويطل على البحر وقريب جداً من جزيرة اللؤلؤة
أتمنى أكون أفدتج ولو عندج أي استفسار ثاني لاتترددين في طرحه

اختي انا ارشح لج الفور سيزون وعقبه الشيراتون
لاتروحين الريدس وايد بعيد عن الاماكن الثانيه
وسينمات اذا تبون السينمات الحلوه العاديه مايهمكم في اي بي روحو فيلاجيو وايد مريحه حتى الفي اي بي
اما اذا تبون في اي بي صح عندكم رويال بلازا مول والسيتي سنتر

النوريq
the ro0ok
مشكورين على التعاون وما قصرتوا وشرفتوني بردودكم ..
بس ما حصلت حجز على الفندقين الاسبوع الجاي ف الويكند ..

أي فندقين ؟.؟
علشان تعرفين انه هالفنادق أفضل الفنادق في قطر
ودايما تكون محجوزه
جربي فندق الماريوت واحجزي في القسم القديم

بالنسبة للسينما أنصح بسينما فيلاجيو على ال vip لأن كراسي الجلوس هناك فيها خصوصية أكثر بسبب المسافة بين الكرسي والآخر أما سينما السيتي سنتر يجلس الشخص وبجانبه شخص غريب يحس بأن هذا الشخص يزاحمه في المكان لا يأخذ راحته في وضع يديه على مقبض الكرسي وإذا عنده طعام مثل الفشار مع البيبسي مافيه غير مكان واحد يا الفشار أو البيبسي !.. على عكس سينما فيلاجيو تماماً!.

نورس الدوحة
أهلاً أخوي نورس الدوحه
أولا الحمدلله على السلامة
وثانياً أنا كنت أقارن بين ال vip اللي في سيتي سنتر واللي في فيلاجيو
يعني ماكنت أقارن بالكراسي العادية
وال vip اللي في سيتي سنتر بين كل كرسي وكرسي طاوله كبيره للأكل والمشروبات يعني بينك وبين الكرسي اللي حذاك مترين
وأذكر بعض الصفوف فيها ثلاث كراسي بس
تخيل الصف مافيه الا ثلاث كراسي ,, دليل انه الكراسي والطاولات كبيره
غير الخدمه اللي تجيك العامله بالطلبات والمشروبات وانت مكانك

شكراً على المداخلة والمعلومة اللي ذكرتيها جديدة علي لأني بصراحة ما جربت اللي في الستي سنتر وعلى وصفك إن شاء الله باجرب لأن أهم شي في جلسة السينما هي الخصوصية في القعده .. وترى الكلام اللي كتبته ما كنت أقصد فيه نقد لك أو شي من هالنوع بس كانت إضافة معلومة مني عن سينما فيلاجيو .. وشكراً على الترحيب وأنا ما صرت أدخل المنتدى لأن المواضيع قامت تعيد نفسها أسئلة تتكرر عن الفنادق وعن الأماكن !!... إذا فيه أماكن جديدة يمكن أدخل أسوي عليها دعاية سياحية .

نورس الدوحة
وأحب أضيف ان كراسي ال vip في السيتي سنتر كراسي جلدية حمرا وكبيره مثل كراسي الدرجة الأولى في الطيارات
وحتى الله يعزك الحمامات موجوده في السينما نفسها وفخمة ونظيفة يعني ماتطلع من القاعه
وسعر الكرسي الواحد 100 ريال بس التجربه ممتعه والواحد لازم يجربها

الفنادق التي ينصح بها وفايف ستار
الريتز كارلتون
غراند حياه
الشيرتون
الفورسيزن