قطر المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
Zajros
10-12-2022 - 10:39 am
السلام عليكم ورحمة الله وبركاته
اخواني الكرام .. تحية طيبه وبعد ,,
اود الأستفسار عن الأماكن السياحيه في قطر مثل المجمعات والقهاوي والمطاعم اوالاماكن السياحيه
علما بأنني سأصل انا وصديقي إلى قطر يوم الجمعه القادم بأذن الله الساعه 8 ونص الصبح والعوده للكويت يوم الأحد الساعه 9 مساءا إذا الله يسر الأمور
وين اقدر استغل هالوقت في اكثر الأماكن متعه في قطر
وانا حجزت في فندق موفنبيك تاور .. هل هو مناسب او غير مناسب ..؟
وتقبلو تحياتي
اخوكم ابوفهد


التعليقات (9)
النوريq
النوريq
اذا تقصد فندق موفنبيك اللي مجابل الفورسيزون بيكون موقعه زين
لكن الفندق بالنسبه انه خمس نجوم مب ذاك الزود
لو سكنتوا في الشيراتون أو الفورسيزون بيكون أفضل
على العموم انا من رايي اول ماتوصلون الصبح تروحون الفندق وتحطون اغراضكم وعقب تطلعون على سوق واقف
مكانه قريب من الفندق 3 دقايق يمكن
واذا دخلتوا السوق تفطروا هناك
فيه وايد مطاعم حلوه
وعقب طبعا بيدخل الظهر وبيكون الجو حار والاماكن مسكره لان الوقت وقت صلاة
يعني ارجعوا الفندق ارتاحوا وعقب الظهر على الساعه 2 او 3 روحوا مجمع سيتي سنتر
مكانه قريب جداً من الفندق ، تقدرون تروحون له مشي
تمشوا هناك وادخلوا السينما لان سينما السيتي سنتر هي أفضل سينمات الدوحه
حاولوا تدخلون الفيلم اللي في السينما الاولى لانها كبيره وحلوه
او لو تبون سينما ال vip سعر التذكره ب 100 ريال لكن روعه
عاد بالليل ماادري تبون تطلعون والا بتكونون منهكين
المهم تقدرون تتعشون في سيتي سنتر او ترجعون سوق واقف وتتمشون هناك لان الحياة الليليه في سوق واقف روعه وخاصه في هالجو الحلو
واذا فيكم حيل تمشوا على الكورنيش لانه مجابل سوق واقف ، وتقدرون تركبون القوارب هناك ويلف فيكم في الكورنيش
بالنسبه لليوم الثاني من رايي تطلعون الصبح وتروحون مجمع فيلاجيو بيكون حلو وهادي وفيه 13 سينما
وفي الليل روحوا جزيرة اللؤلؤة وتمشوا هناك واقعدوا على البحر وعقب تعشوا
وفي حديقة اسمها حديقة اسباير لو تبون تتمشون فيها هي عند فيلاجيو بالضبط
يعني لو طلعتوا من فيلاجيو روحوا الحديقة
واليوم الثالث تقدرون تروحون مجمع اللاند مارك وتتمشون هناك والمجمع حلو الصبح حق القعده والقهاوي
بس ماانصحكم بسينماته
وفي مكان اسمه الحي الثقافي وايد حلو بس مااعتقد تقدرون تروحون له لان المطاعم تفتح في الليل وانتوا طيارتكم الساعه 9 بالليل
شوفوا اذا في سعة في الجدول تقدرون تروحون له
وأتمنى إني أفدتكم
وإذا عندكم اي استفسار أنا حاضره
وان شاء الله تستانسون في قطر

نورس الدوحة
نورس الدوحة
الاحتمال الأقرب هو أنك تقصد فندق موفنبيك تاور الواقع في منطقة الأبراج وهو على كل حال 5 نجوم رغم إني ما دخلته لكن الواضح من شكله إنه (كشخه) خصوصاً إنه جديد و5 نجوم يعني لاتحاتي .. بخصوص جدولك إنت توصل يوم الجمعة أحلى شي إنك تستريح كم ساعة أو يفضل إنك تصلي صلاة الجمعة في الستي سنتر عندهم مسجد في الطابق الأرضي مكان المواقف الداخلية للسيتي يصلون فيه الجمعة .. أول ما تخلص تروح الستي تتمشى شوي وتتغدى مره وحده .. بعدها حاولوا تتمشوون شوي على الكونيش لأن الناس بتكون موجودة بكثرة تشوفون من كل صنف ونوع من البشر يتمشون على الكرونيش وأحلى مافي السالفة إنكم ما تحتاجون سيارة لأن موقع الفندق بيكون قريب من الستي سنتر وقريب من الكورنيش بس تحمل ترى الستي سنتر عندنا غير عن الستي سنتر اللي عندكم يعني كله ماركات ويعادل في مساحته نصف مجمع ( الأفنيوز )عندكم يعني أصغر منه بشوي ! .. بعد الكورنيش إذا بقى فيه وقت تقدرون تروحون سوق واقف بس راح تحتاجون سيارة تاكسي طبعاً .. وهذا كله بالنسبة لليوم الأول..
اليوم الثاني تقدرون تروحون مجمع (فيلاجيو) الصبح وحديقة سباير قريبه منه وكذلك مجمع حياة بلازا .. عموماً اسمح لي الحين عندي شغل بس تقدر تراجع مواضيع الأعضاء لأن أغلبهم يطلبون نفس اللي انت طالبه واسمح لي مره ثانيه .

النوريq
النوريq
أخوي نورس الدوحه انت مادخلت موفنبيك
شلون تحكم عليه وتقول انه حلو وترشحه حق اخونا الكويتي
أتمنى تخف ريلك وتروح تشوف اللوبي من داخل والا تطلع تشوف المطعم وعقب تحكم اذا الفندق يستاهل 5 نجوم والا لا
ومادام الاخ الكويتي مختار فندق بو خمس نجوم لازم أدور له بديل أفضل
والأفضل طبعا هو الشيراتون أو الفورسيزون
لكن موفنبيك ماينفع كأنه فندق ترانزيت
حتى فنادق الترانزيت أحسن منه

soud321
soud321
هلا والله
ممكن تستفيد من جدولي سياحي في الدوحه
https://artravelers.com/p/re/435946

Zajros
Zajros
السلام عليكم ورحمة الله وبركاته
اختي العزيزه النوري شكرا لك على هذا الجدوول الوافي اما بالنسبه لفندق الموفنبيك تاور .. كان يمدحه لي موظف مكتب الحجز .. وانا دخلت على موقع الموفنبيك وشفت الموفنبيك تاور ماكانت فيه صور توضيحيه كافيه للفندق
http://www.moevenpick-hotels.com/en/pub/your_hotels/worldmap/doha_tower/overview.cfm
اخي العزيز نورس الدوحه شكرا لك على هذه المشاركه والاضافه الجميله
اخي العزيز سعود شكراا لك على هذا التقرير الرائع
شكرا لكم جميعا
وتقبلو تحياتي
اخوكم ابوفهد

عــزالخــوي
عــزالخــوي
بنتظارك اخوي لمااترجع .. تقولي لاني ناوي اسافرلقطر .. يقلون قطر تغيرت .. واصبحت تنافس دبي والبحرين
على العلوم ......................... هذا اذا صدقو .. وتخبر كاس العالم عندهم ولازم يهيئون الامور مستقبلأ

Zajros
Zajros
السلام عليكم ورحمة الله وبركاته
اخي العزيز عز الخوي (كفو) نكك له معنى كبير وعساك دووم عز لخوياك واللي حولك
ابشر بأذن الله بالتقرير اللي يبي يسركم .. ولكن انا عندي مشكله بالتصوير (ما اعرف اصور) ولكن بحاول قدر الأمكان اني اصور
والصراحه اعجبوني البيتين اللي انت حاطهم بالتوقيع وسجلتهم عندي بالتليفون
وتقبل تحياتي
اخوك ابوفهد

النوريq
النوريq
عزالخوي
صحيح تنافس دبي
لكن مافي مقارنة بينها وبين البحرين
أصلاً البحرين مافيها شي علشان قطر تنافسها

the ro0ok
the ro0ok
مع البحرين ؟؟؟
قول دبي او ابوظبي ويمكن , البحرين مافيها شي غير مجمعين سيف وستي وباليالله مافي الا الستي
حاليا دبي اعطيها 9/10 والدوحه 7/10 من ناحية التطور وبالنسبه لي الدوحه الثانيه على مستوى الخليج
لكن بعد كاس العالم راح تصير الاولى مو بس على الخليج على العرب والشرق الاوسط


خصم يصل إلى 25%