قطر المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
قلم ذهب
08-12-2022 - 02:37 am
السلام عليكم ورحمة الله
هذي اول مشاركة لي في منتدى قطر واتمنى ما تبخلون علي بمعلوماتكم عن بلادكم الحلوه
ان شاء الله سأتوجه الى الدوحه نهاية هذا الشهر وعندي بعض الاستفسارات:
كيف الجو في هالفتره؟؟ يعني برد قارص او بروده حلوه؟؟
فترة الزيارة بتكون لمدة 5 أيام...حصلت ع بعض الاماكن السياحية اللي ممكن اروح لها مثل جزيرة اللؤلؤة وسوق واقف وحديقة أسباير.. بس هذي ممكن تخلص في يومين
شو هي الاماكن الثانيه اللي تشجعوني عليها واللي اقدر اغطي فيها برنامجي خلال 5 ايام
وبالنسبة للشوبينج شو هيه افضل المولات؟!
ولكم جزيل الشكر والتقدير


التعليقات (9)
النوريq
النوريq
حياك الله في قطر
بالنسبة للأماكن السياحية في قطر عندك :
1- اللؤلؤة
2- الكورنيش
3- سوق واقف
4- الحي الثقافي
5- متحف الفن الإسلامي
6- سيتي سنتر : للتسوق
7- فيلاجيو : للتسوق
8- لاند مارك : للتسوق
9- حديقة إسباير
طبعاً هذي تعتبر أفضل المجمعات عندنا لكن لو تبون تزورون مجمعات ثانية عندك :
1- المول
2- رويال بلازا
3- حياة بلازا
وترى المول حلو فيه محلات ومطاعم وسينمات وألعاب للأطفال
يعني مناسب للعائلة
وكذلك الرويال بلازا راقي
بس حياة بلازا مافيه سينمات
الشي المشهور فيه هو مدينة الألعاب للصغار والكبار " جنغل زون "
بالإضافة إلى " المخازن الكبرى "
وطبعا فيه محلات كثيره والحين ذكرتني إني من زمان مارحت له وحشني
أعتقد هالاماكن بتكفيكم لمدة خمسة أيام وتقدرون تكررون الأماكن اللي تعجبكم
ولو تبيني أسوي لكم جدول أنا حاضره إن شاء الله

النوريq
النوريq
أخوي ممكن أعرف إنت من وين ؟

قلم ذهب
قلم ذهب
تسلمين يالنوري..كفيتي ووفيتي..جزاك الله الف خير
اختك من مسقط..
انزين اش رايج ف فندق الليوان؟؟ شفت كثيرين يمدحوا مواصفاته وموقعه
تقترحين فندق ثاني؟؟
ياليت والله لو ترتبيلنا جدول حلو بكون شاكره لج

النوريq
النوريq
بالنسبة للجدول :
اليوم الأول : الصبح روحوا سيتي سنتر واقعدوا فيه لين الظهر او العصر لان المجمع كبير وايد
ومن العصر لين المغرب اقعدوا في اللؤلؤة وتعشوا فيها
اليوم الثاني : روحوا مجمع فيلاجيو وحوسوا فيه لين ماتشبعون وعقب في الليل روحوا سوق واقف وتمشوا فيه وتعشوا
اليوم الثالث : روحوا مجمع اللاند مارك الصبح وعقبها العصر روحوا حديقة اسباير زون
وتقدرون عقب ماتخلصون من الحديقه تروحون مجمع حياة بلازا لانه قريب جدا من الحديقه يمكن دقيقتين بس
وتقدرون تتعشون فيه
أو لو عجبكم فيلاجيو روحوا له مره ثانيه عقب الحديقه
اليوم الرابع : الصبح تقدرون تروحون المتحف الاسلامي ، والعصر روحوا الكورنيش وتمشوا فيه واركبوا القوارب لو تبون
بس تحملوا تغرقون ، وعقب المغرب روحوا الحي الثقافي وتمشوا فيه وتعشوا
فيه مطاعم حلوه مثل مطعم زعفران ( الهندي ) ومطعم خان فاروق ( المصري ) ومطعم سكر باشا ( التركي )
اليوم الخامس : تقدرون تروحون الصبح فندق فريج شرق
وايد حلو الفندق ويطل على البحر وتقدرون تطلعون برا وتتمشون على الشاطئ الرملي أو تقعدون في القهوه
وعقب روحوا رويال بلازا ، واذا خلصتوا منه روحوا تغدوا في شبستان
او روحوا المطاعم العربيه الموجوده بكثره في شارع السد
وفي الليل روحوا المول
ومايمنع انكم تكررون زياراتكم للسيتي سنتر او فيلاجيو او سوق واقف
لان هالاماكن حلوه وماينمل منها ولازم تروحون لها كذا مره لين ماتشبعون منها

احلى من العقد
احلى من العقد
  1. المولات من الاحسن الى الاسوء من وجهة نظري

  2. حديقة اسباير (( حلوه وكبيره وفيها نافورات حلوه )) -

  3. الحديقة المائية اكوابارك ((يمدحونها بس مارحتها )) -


احب اضيف للاماكن حديقة الحيوانات .. اذا عندكم اطفال او اذا انتو كبار وتحبون هالاشياء بصراحة حديقة الحيوان عندنا وايد حلوه ...
وفي مكان حلو لا تفوتينه اسمه كاتارا او الحي الثقافي .. بعد لاتفوتينه ...
واقدر اقترح عليج تتعشين في مطعم منتجع فريج شرق وعقب العشا او قبله تتمشين في مرافق المنتجع على البحر وبجانب الحديقة و حمام السباحة والسوق الداخلي في المنتجع ... من باب التغير ...
وممكن ايضا تتعشين في فندق قراند حياة وتتمشين بعد العشا في حديقة الفندق على البحر وتشوفين منظر اللولوه على الطرف الاخر ... بصراحه هالمكانين روعة ... انصحج فيهم ...
وسوق واقف لاتفوتينه لاتظنين انه مجرد سوق شعبي .. لا هو مكان سياحي كامل وحلو جدا .

المولات من الاحسن الى الاسوء من وجهة نظري

فيلاجيو(فيه سينما) - سيتي سنتر(فيه سينما) - لاندمارك (فيه سينما) - حياة بلازا - المول(فيه سينما) - رويال بلازا(فيه سينما) - امبوريوم - السلام بلازا هاي الي في بالي الحين .... كتسوق ..
الحدائق : حديقة الحيوان (( عن نفسي انا ماحب الحيوانات بس احب حديقة الحيوانات بالذات في الويك اند كلها حياه و فيها مطاعم للوجبات الخفيفه والعاب للاطفال و في بعض الحيوانات مع مدربين مختصين خارج القفص ممكن لاطفالكم او انتو تمسكون الحيوانات وتصورون معاهم وايضا يمكنكم اطعام الحيوانات والزرافه مجانا طبعا والاكل يكون متوفر عند قفص الزرافة مجانا ))

حديقة اسباير (( حلوه وكبيره وفيها نافورات حلوه )) -

حديقة رميله(( ويوم الخميس فيها فعاليات عادتاً طبول واغاني شعبيه واكشاك تبيع وجبات خفيفه ومراجيح والعاب اطفال وشوية محلات )) -
الكورنيش (( يوجد مطعم على الكورنيش حلو ممكن تاكلون فيه اسمه بلهمبار واعتقد غيرو اسمه سموه المرجان وممكن تاخذون مركب يمشي فيكم على طول الكورنيش وبالليل المنظر حلو وشكل الابراج رائعة و العصر او المغرب ايضا المنظر حلو وغير عن منظر الليل )) -

الحديقة المائية اكوابارك ((يمدحونها بس مارحتها )) -

اللولوة (( فيها ممشى على البحر و كوفي شوبات و مطاعم و محلات تجاريه وايد وفيه كوفي شوب اسمه شوكلت بار او شي جي نسيت اسمه بس هاي وايد مشهور وله فرع في هارودز بلندن و في اللولوه فعاليات بالذات في الويك اند وتشوفين المكان يكون حي لين اخر الليل يعني حلو تقضون اخر اليوم فيه من عقب الساعة 9 مسائاً صعب تلقون مكان تجلسون فيه من كثر الاقبال )) -
كاتارا او الحي الثقافي : ممشى على البحر وفيه بنايات حلوه ومطاعم يستحق الزيارة بس مب كل الاماكن فيه مفتوحه .

غريب الاه
غريب الاه
النوريq و احلى من العقد
بيض الله وجيهم ماقصر ي قلم ذهب
مخطط ولا الحلى من كذا شي
فيه ملاحظة صغيرة
لاتتجاوزون السرعة المقرره انا صادني الرادار يوم اني ابي اروح اصلي صلاة العيد

قلم ذهب
قلم ذهب
النوري واحلى من العقد بصراحه ما ادري كيف اشكركم...الله لا يحرم هالمنتدى منكم..تسلم اياديكم ع اللي خطته
النوري تسلمي حبيبتي البرنامج حلو ومرتب..والله تشجعت اكثر ع هالسفره
واشكرج يا احلى من العقد ع التفاصيل...ان شالله راح نزور كل هالاماكن الحلوه
ألف شكر

قلم ذهب
قلم ذهب
غريب الاه
بيض الله وجيهم ماقصر ي قلم ذهب
مخطط ولا الحلى من كذا شي
فيه ملاحظة صغيرة
لاتتجاوزون السرعة المقرره انا صادني الرادار يوم اني ابي اروح اصلي صلاة العيد
اي والله والنعم فيهم ما قصروا
اشكرك اخي غريب الآه ع النصيحه القيمه...ان شالله راح نلتزم بالسرعه...بس ع طاري السرعه من وين ممكن نستأجر سيارات؟؟؟

النوريq
النوريq
غريب الاه
وجهك أبيض اخوي غريب الاه


خصم يصل إلى 25%