سويسرا المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
sulaimaaan
17-01-2022 - 03:08 pm
  1. الله يعينكم فكرت أروح لأوروبا الله من الغثى اللي بتشوفونه مني ههه ..

  2. أدري هذرت عليكم شوي .. لكن توكم ماشفتوا شي ههه ..


السلام عليكم ورحمة الله وبركاته
مساكم/ صبحكم الله بالخير جميعا حبايبنا .. كيف حالكم ان شاء الله طيبين ..

الله يعينكم فكرت أروح لأوروبا الله من الغثى اللي بتشوفونه مني ههه ..

اخواني وأخواتي .. فكرت أنا والمدام من فتره مو قصيره اننا نسافر إلى أوروبا .. خصوصا ان حلمي اني أسافر لأوروبا وأستاجر سيارة وماغير فرفره بهالمدن الأوروبيه .. اتفقنا على موضوع السفرية .. لكن الوقت لسى مب متأكدين منه .. هي بإذن الله مهب أقل من 6 شهور من الآن .. فكرنا تكون في شهر جون (6)2011 أو جولاي (7) 2011 أو نخليها بعد العيد مثلا أو بداية الدراسة مثلا على شهر سبتمبر (9) ..
علشان اكون صريح معكم انا أصلا ماكنت ادري وين أحط هالإستفسار أو هالموضوع بأي بوابة .. لكن لحبي لسويسرا قلت احطه ببوابة سويسرا أفضل على أمنية الشباب اللي سووا زي اللي انا سويته من البوابات الثانية يشرفوني بهالموضوع ويعذروني اني ماحطيت هالموضوع ببوابتهم ..
وبصراحة أيضا انا قريت كذا موضوع من بواية سويسرا وقريت مويضيع من بوابة النمسا .. وشفت ان الموضوع مطوول قدامي بوابات المانيا وايطاليا والنمسا وسويسرا لازم انخلهن نخل ..
لكن بالبداية انا أصلا ماحددت مسار للرحلة! ..اذا حددت بإذن الله أبدا أنخل البوابات اللي يبيلهن نخل ههه ..
لذلك أتمنى تعطوني آرائكم بهالخصوص .. انا قريت تقرير مميز جدا للأخ ابو بتال وكان تقرير بكل صراحة رائع واستفدت منه كثير الله يعطيه العافيه ابو بتال على هالتقرير .. اعجبني خط سيره ( ألمانيا - النمسا - سويسرا مع تسييره على فينيس وباريس ) اللي ابيه شي زي كذا .. اني اسكن النمسا فتره اتنقل بين مدنها المشهوره زي زيلاميسي .. ومن النمسا أسير مثلا على إيطاليا في كم مدينه زي فينيس .. بعد كذا نرجع للنمسا ناخذ عفشنا نروح لسويسرا وانترلاكن وكم ديره ومع تسييرات لكم مدينه في فرنسا .. انا مابي افر كل مدن العالم اللي ابيه رحلة استجمام نتذكرها طول العمر بإذن الله .. مع العلم ان الرحله تجديد لشهل العسل واستجمام ..
الميزانية لم تحدد بعد .. لكن اللي أبيه اني أخلي رسوم السفر الدولي على الفنادق والسياره مثلا موزون جدا ومعقول ومايكون جدا غالي .. علشان نخلي المبلغ الباقي كله للسفر والتسوق ..
لسى بدري بقوه على هالكلام انا عارف .. يعني باقي تقريبا حدود 8 شهور على وقت السفر وعلى حسب الوقت المتفق عليه بإذن الله تعالى ..

أدري هذرت عليكم شوي .. لكن توكم ماشفتوا شي ههه ..

مجرد آرائكم حول الخطه لهالسفريه حسب خبراتكم .. ويله كل واحد يفسر ذرعانه يورينا شطارته بترتيب السفر لشخصين زوج وزوجته .. من مخرج 15 الرياض لين مخرج 15 الرياض مرورا بمدن أوروبا اللي بينصحني بها .. طبعا الخطه تكون النمسا وسويسرا واللي حولها .. ايطاليا فرنسا المانيا ومادري ايش بعد .. مهب بالشرط تكون كل هالدول مره وحده مايمنع التنازل عن شي منها وبرضو مايشترط السكن في احد منها .. نظام التسيير ممكن .. أبو يوم والرجعه للفندق اليوم الثاني مثلا او التسييره والرجعه بنفس اليوم زي ما أسلفت ..
راح أنسخ هالموضوع لكم بوابة نداء للخبراء بإذن الله تعالى .. علشان ياخذ هالموضوع اهتمام أوسع .. انا اللي أبيه بس اني أعرف خط السير وبعدها ان شاء الله كل شي تمام .. طبعا اهم شي الوقت والطقس هناك .. وطبعا الأسعار متى يكون وقت ارتفاع الأسعار يعني الصيفيه عندنا ..
الله يجزاكم خير ودنا باهتمام وهذا ماعهدناه منكم .. سبق جربت بوابة انجلترا والشباب كانوا رائعين وخاصة الاخ العزيز القطري الله يذكره بالخير .. لذلك كان لي تجربه ممتازه في بوابة أوروبا .. وأيضا ممتازه جدا في شرق آسيا لشهر العسل اللي كان في ماليزيا ..
عافاكم ربي يا اخوان


التعليقات (9)
sulaimaaan
sulaimaaan
ياليت تدعموننا بالصور الله لايهينكم والخرائط .. ادري اني رجالن عله ههه

أم دارين
أم دارين
السلام عليكم بالنسبة لرحلة شهر العسل مجدد اختيار موفق جدا لسويرا بلد الاستجمام والرفاهية اذا انتو شخصين فقط افضل انك تبدا بدولة والرجوع الي من مكان اخر مثلا الذهاب الى ميونخ والرجوع من فرنسا الى الرياض او ميونخ والرجوع من جنيف او زيورخ ممكن تطرح موضوعك في الاستفسارات لالمانيا لان اذا بتشوف خريطة اوروبا بتبدا من ميونخ يعني من اسفل وانت صاعد فوق الى فرنسا او سويسرا ( ميونخ - سالزبرغ-زي لم سي - ترجع ميونخ نفس اليوم او تبي تنام في زي لم سي - من ميونخ الى زيورخ 3 ساعات الى 4 ساعات بالسيارة تقعد فيها من يومين الى 3 ايام بالكثير من هناك اتروح الى انترلاكن والجلوس 5 ايام في فندق كريبس انه وايد اسوي دعايه على الفندق وايد عجبني ههه- ومن انترلاكن الى جنيف - بعدها اتروح حوالين جنيف الى هي لوزان نص ساعة بالسيارة و شامونيه وانسي ساعة الا ربع بالسيارة هذي على الحدود الفرنسية - ممكن من جنيف اتروح لوقانو او ميلانو للتسوق - اذا حاب من جنيف اتروح باريس 5 الى 6 ساعات بالسيارة والرجوع الى الرياض وللزيادة ممكن اتروح من باريس الى بلجيكا ساعة ونصف بالقطار وهذي رحله شهر عسل ولا احلى )

sulaimaaan
sulaimaaan
الله يعطيك العافيه اختي ام دارين على التجاوب ..
انا كتبت استفسار في القسم الالماني لكنه مغلق لسبب أجهله بصراحة .. اتنمى اعرف السبب على الأقل اذا في هاخطأ احاول اني ما أسويه مره ثانيه مستقبلا بإذن الله ..
برنامج جدا ممتاز صراحة .. هذا اللي أبيه أسماء مدن ريفيه مثلا وكذا بحيث اني اقرا عنها أكثر وأكثر سواء في المنتدى أو من العم قوقل .. جدا أعجبني ترتيبك وسردك خصوصا الوقت المتوقع لكل مكان ..
بالنسبه لفرنسا إيش وضع الحجاب والنقاب هناك بالضبط الحين ؟ وش رسوا عليه؟ هل النقاب ممنوع مثلا للسائحات او ايش الوضع؟؟
عافاك ربي اختي وبإنتظار ريكومنديشنان ثانيات من خبراءنا الأعزاء ..

دمـوع الوجـد
دمـوع الوجـد
النقاب ممنوع من الصيف الجاي
واحسن شهر سبتمبر 9 روقان والناس قليل والجو احلى

M!$s Paris
M!$s Paris
انا انصح بان تجلس في كل منطقه تزورها لاستكشافها خصوصا انها اول مره تروح اوروبا... وش رايك تبدا الرحله بالنمسا ...وتتنتهي بايطاليا ..وتكون بهالترتيب فيينا_سالزبرغ_زيلامسي_ميونخ_زيورخ_انترلاكن _ميلانو ولو حبيت تزور جنيف ممكن تحطها بعد زيورخ ...او عطني عدد الايام ونضبط لك برنامج ع الكيف ...

sulaimaaan
sulaimaaan
اختي بنت حواء .. الله يعطيك العافيه هذا الكلام اجل .. ممنوع من الصيف الجاي ..
اجل شكلها بتتكنسل فرنسا .. احسن اهم ماعلي راحت المدام .. مهب نروح هناك وبس نتهجهج من الناس .. جزاك الله خير
اختي مس باريس يامال العافيه على هالخطه .. بس لوو عندك خريْطه صغنونه لهالمناطق كلها يعني خريطة هالمربع النمسا سويسرا المانيا ايطاليا .. اكون شاكر لك اكثر من الحين ههه
المده الله يسلمك خلينا نقول مبدئيا تقريبا من 14 الى 16 يوم كذا. والفتره ماني متأكد بس خلينا نقول في بداية شهو 6 ميلادي .. هل يوافق هالوقت ارتفاع الاسعار بسبب الصيف؟

M!$s Paris
M!$s Paris
الله يعافيك اخوي ..وهذي الخريطة ممتازه شامله للدول اللي حاب تزورها ..وراح نرتب لك برنامج يناسب عدد الايام ...

وبالنسبه لاختيار شهر 6 فهو ممتاز ..والاسعار فيه ممتازه..بس انصحك بالحجز للفنادق بموقع بوكينق
https://www.booking.com
وبالنسبه للخطوط لو اخترت خطوط غير السعوديه فأنا انصحك تحجز من نفس موقع الخطوط ...حتى توفر على نفسك ماديا..وهذا اللي انا جربته ...

sulaimaaan
sulaimaaan
اب اب وش هالخريطه ووش هالتوضيح اللي عليها .. ماتوقعت نص هالخريطه او الايضاحات .. ماشاء الله عليك اختي الله يجزاك خير ..
حاليا خلينا نضبط برنامج السفره بشكل عام ووين بروح بالضبط وبعد كذا اشوف الفنادق وغالبا راح يكون عن طريق بوكنق ..
راح اشوف خريطتك مره ثانيه بس بشكل اكبر لاني اكتب من الايفون الحين وراح احفط الصوره في اللاب وامخمخ عليها .. بس انتي اختي ايش اقتراحك ؟
الخطوط باذن الله هذا اللي ناويه .. اذا مب على خطوطنا فهي على نفس خطوط الدوله اللي بروح لها باذن الله .. سعر افضل وبدون ترانزيتات ووجع راس ..

M!$s Paris
M!$s Paris
فعلا اخوي الدايركت افضل ... بس للاسف الخطوط السعوديه ماتروح فيينا وميونخ ...فلذلك لو حبيت تكون رحلتك على الخطوط السعوديه راح نلغي النمسا ونستبدلها بالمانيا ..ويكون ترتيب الرحله بهالشكل ..
فرانكفورت_ميونخ_زيورخ _جنيف_ انترلاكن_ميلانو... او العكس


خصم يصل إلى 25%