- سعر التذكرة: ب 3750 ريال سعودي للشخص
- نبذة بسيطة عن الانشطة والاكتيفيتس في كل منطقة
- كيب تاون
السلام عليكم
ومساكم الله بالخير جميعاً
اول شيء و قبل ما ابدا موضوعي احب اقدم شكري الخالص للأخ فوكس على كل المعلومات اللي افادني فيها قبل سفرتي الناجحة 100 % الى جنوب افريقيا ، و اقول له ما قصرت و بيض الله وجهك و عساك على القوة
طيب في البداية خلوني اقول موضوعي عبارة عن خربشات بكتبها و بسردها بشكل عام علشان يستفيدون منها الاعضاء و من بينها راح اقولكم عن رحلتي بتفاصيلها بس بدون صور - الا اذا احد حمسني -
لأني طول عمري اسافر و ولاعمري فكرت انزل تقرير عن سفرتي لأني اتعيجز اضبط الصور و ارفعها و اقول دايم ما شاء الله على اللي ينزلون صورهم خ
فاسمحولي ابدا اقولكم بجدول رحلتي
عدد المسافرين : 2 ( انا و زوجتي )
سبب الرحلة : ترويح و تجديد - يعني مو شهر عسل هع -
كانت سفرتي عن طريق طيران الاتحاد
الدمام - ابو ظبي (الاقلاع الساعة 5.45 العصر و الوصول 8.05 الى ابو ظبي )
ابو ظبي - كيب تاون ( الاقلاع الساعة 10.20 الليل و الوصول من بكره 8,30 الصباح )
سعر التذكرة: ب 3750 ريال سعودي للشخص
الخيانة اللي تفاجئت فيها في مطار ابوظبي ان الرحلة مهي دايركت ل كيب تاون ، راح تكون 8 ساعات تقريباً الى جوهانسبيرغ و بعدين توقف علشان تنزل ركاب لمدة ساعة و نص ، و بعدها تروح لكيب تاون - ساعتين و نص تقريباً - من دون ما ننزل من الطيارة
مع اني لما حجزت و دفعت كل شيء عند طيران الاتحاد و في موقعهم ما حصلت اي شيء من هالقبيل
عموماً
كانت الرحلة 13 يوم , مقسمة كالتالي :6 ايام كيب تاون = فندق Protea hotel Victoria Junction - اربع نجوم
وهذا رابطهم
https://www.booking.com/hotel/za/protea-victoria-junction.html?aid=1300939 السيارة هي Nissan Tiida
اخذت جير توماتيك نظراً لأن نظام القيادة بريطاني يعني السواق على اليمين
فما قدرت اني اتخيل اني اسوق جير عادي و ايدي اليسار هي اللي تعشق خ
و الكيلومترات مفتوحة
سعر اليوم الواحد : 250 ريال تقريباً
و استأجرت من نفس المكتب جهاز GPS بسعر : 35 ريال سعودي لليوم الواحد تقريباً
السيارة استلمتها في كيب تاون اول ما وصلت و جلست ال 6 ايام حقتي في كيب تاون
بعدها مسكت خط فيها لمدينة الجاردن روت و اللي تبعد عن كيب تاون مسافة 5 ساعات تقريباً
و جلست في جاردن روت 3 ايام و بعدها سلمت السيارة في مطار جورج
والشركة تاخذ على استرجاع السيارة لكيب تاون سعر 400 ريال تقريباً
بعدها من مطار جورج كنت حاجز على طيارة الى جوهانسبيرغ
على طيران 1time
وهذا موقعهم https://www.1time.aero/
سعر التذكرة للشخص الواحد : 510 ريال تقريباً
الاقلاع كان الساعة 12,25 الظهر و الوصول 2,15 الظهر
نبذة بسيطة عن الانشطة والاكتيفيتس في كل منطقة
كيب تاون
رحت تقريباً لكل الاماكن هناك ( خليج هاوت - حديقة عالم الطيور - شاطئ كامبس اي - حديقة الزهور - مجمع الكنال ووك - رأس الرجاء الصالح - مزرعة النعام - شاطئ البطاريق - رحلة هلكوبتر عن طريق مكتب في الواترفرونت - جبل الطاولة - هضبة الاشارة ..... الخ )
المكان الوحيد اللي ما استسغته و ما عجبني ابداً ( هو حديقة الزهور ) ، ما عجبني ولا احد يسأل ليش خ
بالنسبة لحديقة النعام ما انصح تروحون لها لأني تفاجئت بوجود النعام بكل مكان و بكل حديقة حيوان و بالسفاري و حتى بالخط لجاردن روت
جزيرة روبن آيلاند كنت مقرود فيها ، حجزت و دفعت لها تذكرة في اليوم الخامس ، على اساس اليوم السادس راح امسك الخط لجاردن روت من الصبح
يوم رحنا اليوم الخامس قالوا تكنسلت الرحلة بسبب الاحوال الجوية و خلونا نسترجع المبالغ
و بالنسبة لملاهي راتنجا ايضاً ما رحت لها لأنها مسكرة وما تفتح الا بتاريخ 22 سبتمبر
وباقي الاماكن كلها رحت لها و فيه شغلات كثيرة ايضاً استكشفتها بكتب لكم عنها لما اتذكرها خ
جاردن روت
اغلب الانشطة كانت قريبة مني نظراً لاني ساكن في Knysna
فرحت ل رأس نايزنا- جنة عدن - كانقو كايفز - اطول زحليقة بالعالم ... الخ
فيه برضوا اماكن رحنا لها ما اتذكرها
بالنسبة ل جنة عدن فهي نار عدن وليس جنة خ
ابداً ابداً ابداً ما اعجبتني مجرد تمشي بالغابة ، حطوا للناس ممشى عبارة عن خشب تمشي عليه و بس
غابة يا جماعة مافيها شيء اشجار ضخمة و تتمشى بينها ، طيب وبعدين ؟ خ
بنفس الطريقة ممكن تروح لأطول زحليقة بالعالم و اللي هي تجربة جداً رائعة , عبارة عن تنقل بالكيابل بين اشجار وانهار ب 10 مراحل ، والطريق لها ساعة ونص تقريباً ، بس صراحة تجربة حلوة
برجعتك من كانقو كيفز راح تجيك حديقة حيوان على يمينك نسيت اسمها ، جداً رائعة لا تفوتكم
جوهانسبيرغ
مركز كارلتون التجاري - مدينة جولد ريف - منتزه الاسود .... غيرها
مركز كارلتون روعة و فيها ساحة مانديلا
مدينة جولد ريف ملاهي ضخمة وفيها جميع الالعاب الممتعة و تستاهل يوم لحالها
و منتزه الاسود حاجة ثانية ، تدخل بسيارتك بين الاسود و فيه بينك و بينهم الا باب السيارة
الجو رهيبب ومخيف و اكشن
ممكن البعض يسأل معقولة 4 ايام ما رحت الا الثلاث اماكن ؟
اقولكم بعد شوي ليش هع
بالرد اللي تحت راح اكتب اهم الملاحظات المهمة قبل السفر الى جنوب افريقيا
ملاحظات هامة قبل السفر الى جنوب افريقيا
اخواني النقاط هذي بالنسبة لي اهم من كل شيء كتبته فوق
لأني وقعت في مصائب بسببها
اولاً : عند تأجير السيارة ، يوجد اكثر من 10 شركات لتأجير السيارات في جنوب افريقيا ، جميعها بلا استثناء ترفض قبول بطاقة الفيزا او الماستر كارد اللي ارقامها غير بارزة
لاحظوا الصورة هنا
http://acakadutdesign.files.wordpress.com/2009/11/vccpaypalindonesia_card_big.jpg
الارقام مكتوبة كتابة ، لكنها غير بارزة وهذا النوع يتم رفضه من قبل كل الشركات
وللمعلومية انا سيارتي الاولى اجرتها من شركة National Car Rental
لمدة 9 ايام و كانت رافضة تماماً هذي البطاقة اللي ما كنت جايب الا هي ، وقبلتها بعد محاولات عدة معهم
و في جوهانسبيرغ كنت حاجز سيارة عن طريقة شركة First Car Rental
ورفضت السيارة تماماً انها تعطيني السيارة بالبطاقة هذي
ولما رجعت لشركة الاولى في فرع مطار جوهانسبيرغ ايضاً رفضت لكن لما وريتهم الفاتورة حقت مكتب كيب تاون ، صارت بينهم وبين الفرع اللي في كيب تاون مصارعة بالتلفون ، و اضطروا انهم يقبلونها
يعني انا مشت معاي بفضل من الله و لكن الاصل انها ما تمشي
ثانياً : لكل شخص يبدا قيادة السيارة في كيب تاون ، حاول ان ما يكون مخططك في الايام الاولى الذهاب ل رأس الرجاء الصالح ، نظراً لان الطريق للمنطقة هذي مخيف نوعاً ما كونه جبلي وكونك توك تحاول تتأقلم على القيادة هناك ، لذلك خل الذهاب لهالمنطقة بثالث يوم بعد ما تتعود على قيادة السيارة ، و علشان اسهل لك الامور ، في اول يوم حاول تلحق السيارات اللي قدامك علشان ما تلخبط و انتبه دائماً اذا دخلت الدوار لا تلخبط ، و اذا حسيت بلخبطة كمل دورة دورتين في الدوار لين تصيد دخلتك الصحيحةوخذها قاعدة في الشوارع اللي تكون رايح جاي ، الرصيف دائماً يكون على يسارك
ثالثاً : لا تستخدم بطاقة الفيزا الا في المحلات الفخمة و الاماكن المشهورة وابعد عن الكشكات و احذر تغلط غلطتي و تخلي احد ياخذ صورة من البطاقة
شركة اجار السيارات رفضت تستخدم بطاقة الفيزا لأن ارقامها مو بارزة لكن علشان تعطيني السيارة اشترطت علي انها تاخذ صورة من الجهة الامامية من البطاقة و وافقت مع اني كنت متخوف
و بعد 10 اياام بالضبط صارت تجيني مسجات على جوالي انه في عمليات قاعدة تصير على بطاقتي مع انها معاي !
الاخ اللي اخذ نسخة من البطاقة قاعد يشتري من مطاعم و سوبرماركت على حسابي !
الا ان كلمت اخوي و اخوي كلم البنك خليتهم يوقفون البطاقة نهائياً ، الحرامي اشترى بأكثر من 1000 ريال على حسابي
لذلك احذر كل الحذر انك تعطي احد نسخة من البطاقة
رابعاً : سعر اجار السيارة في 9 ايام كان 2273 ريال ، بعد ما اجرت السيارة و انا متجه للفندق ، تفاجئت ان شركة اجار السيارات مسكت مبلغ 7000 ريال تقريباً و هذا الشيء انتبهوا منه
الشركة تمسك هالمبلغ بحسابك و ما تقدر تستخدمه نهائياً و السبب يكون هالمبلغ مثل التأمين في حالة صار لك حادث او صاروا الشركة يطالبونك بأي شيء ، يسحبون من هالمبلغ
المشكلة لما ترجع السيارة ما تسترجع المبلغ على طول ، يكون الاسترجاع اقل شيء بعد 4 ايام و هالشيء تقريباً يدمر اصحاب الميزانيات المحدودة.
خامساً : مافيه شيء اسمه انترنت بلاش في جنوب افريقيا ، حتى في الفنادق 5 ستار - والله اعلم - و الانترنت عندهم غالي .
سادساً : كل المناطق في جنوب افريقيا تجد الرحبية و الروح العالية و الابتسامة الحلوة في كل مكان ماعدا في جوهانسبيرغ الكل معصب - ما ادري ليش -
سابعاً : مدينة صن سيتي خصصت لها يوم كامل بدون ما اسكن فيها ، وهي مدينة تبعد ساعتين و نص عن جوهانسبيرغ و مليانة انشطة لكن يوم واحد ما يكفيها و لازم تسكن ، لأن الطريق في الليل بالرجعة مظلم جداً و مخيف
واغلب الانشطة اللي فيها مثل السفاري و ركوب البالون يبدون الساعة 5 ونص الصباح
وانا وصلت لها الساعة 10 الصباح تقريباً
ثامناً : مدينة صن سيتي - لا تصلح للمتزوجين - من وجهة نظري , مع ان الانشطة فيها جداً رائعة الا ان التفصخ والمناظر الخادشة للحياء في كل مكان مع اني توقعت ما اشوفها الا جنب البرك !تاسعاً : لمن يملك بلاك بيري و يحب يستخدم البلاك بيري ماسنجر بشريحة جنوب افريقيا ، عند شرائك لشريحة من شركة فودافون ، اطلب من صاحب المحل يفعلها لك و اطلب منه يشغل لك خدمات الانترنت و سعرها تقريباً ب 35 ريال سعودي ، بعدا ما يشغلها سو ريستارت للجوال و راح تلقى خدمة البلاك بري شغالة مع العلم انها ما تستهلك شيء من رصيدك نهائياً حتى لو حملت روابط صور او مقاطع جوال .
عاشراً : بالنسبة لاسترجاع الضرائب او ال Tax في المطار ، نظامهم سخيف و غبي ، المطلوب مهو الفواتير بس ، المطلوب كل شيء شريته مع الفاتورة ، شريت تي شيرت ، تجيب التي شيرت مع الفاتورة ، يعني بالعربي لا تقفل شنطتك و هالشيء مستحيل طبعاً ، تجادلت معاهم على نظامهم الغبي ، يعني احنا يالله نسكر الشنطة تبين نفتحها علشان ضرايبكم ، عموماً وجب التنبيه خ .
هذا اللي اذكره و اذا تذكرت شيء ما راح اقصر معاكم