الكويت المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
ابو الوليد 2
01-10-2022 - 10:49 am
هلا اخواني اشكر جهوكم المباركه والواضحه في هذا المنتدى
باذنه تعالى بنسافر للكويت هاليومين من الرياض الى الكويت مرورا بالبحرين
ياليت يا اخوان تعطونى خطه السير مع العلم انى مع زوجتى وبناتى اسرتى فقط
وش تنصحوني فيه السفر بالليل ام النهار وهل هناك خطوره بالطريق ام انه امن
وابي خطه محبوكه لمخطط الرحله لمده حوالي اسبوع او 8 ايام
كم التكلفه وطريقه تحويل العمله تنصحونى احولها كلها للكويتى ام ابقي منها بالسعودي
ووين احولها ببنك بالسعوديه ام في اماكن الصرافه وهل تفرق بالسعر
وهل احولي المبلغ في الكويت مابيزيدوا على واضمن مكان اقدر احول منه
بصراحه اول مره اسافر وكذلك الاهل معاي فمتردد كثير وابي منكم النصيحه
وابي منكم اسماء اماكن وفنادق ومجمعات ومولات ومطاعم تنصحوني فيها
عموما كم تكلفه الرحله لحوالي 5 اشخاص انا وزوجتى واطفالي
شاكر لكم وانتظركم على جمر


التعليقات (3)
فهد الأحمد
فهد الأحمد
أخوي بالنسبة للطريق الاخوان يفيدونك اكثر مني
بالنسبة لتحويل العملة طبا الصرافين سعرهم افضل من البنوك وبالنسبة للتحويل اكيد في بلدك التحويل افضل من البلد اللي ترغب بالسفر إليه عموما هالأيام يشترون الريال بالكويت ب من 75 إلى 76 فلس اي 100 دينار كويتي تشتريها ب 1333 ريال وشوف إنت الاسعار بالرياض وأحكم .
بالنسبة للمدة كأنها كثير 8 أيام لو إقتصرت لخمس أيام افضل ولكن خذ أبرز الاماكن وأيضا شوف البوابة تراهي مليانة من التقارير والمعلومات السياحية المفيدة
1- المدية الترفيهية بمنطقة الدوحة تفتح من الساة 5 العصر لغاية 11 أو 12 بالليل
2- المركز العلمي بالسالمية (الاكواريوم - الأسماك- وسينما البعد الثلاثي imax
3- الأكوابارك (الألعاب المائية) قرب الأبراج طريق البحر بالعاصمة
4- أبراج الكويت
5- حديقة الشعب
6- سوق السالمية عبارة عن سوق به محلات ومطاعم وكافيهات وسوبر ماركت كبير ويوجد صالة ألعاب للأطفال (طفل المستقبل)
7- سوق المباركية لا غنى لك عنه وتقضي الوقت به من قبل صلاة المغرب ولغاية 12 بالليل بين تسوق وأكل
اما المولا بالكويت فحدث ولا حرج (الافنيوز ،سوق شرق ،المارينا ، الفنار،الكوت وكويت ماجيك والألعاب الخارجية التابعة لها .
طبعا ان كتبت لك بشكل مختصر وتستطيع أن تتعرف على امزيد من خلال إطلاعك على بوابة الكويت

حمامة الرياض
حمامة الرياض
اذا بتروح للبحرين قبل معناته انك راح تطلع من البحرين الدمام الكويت
تقريبا 7 ساعات ونص
اما من الرياض المجمعه حفر الباطن اقل بكثير
الطريق الجديد رماح الرمحيه -قرية العليا الكويت اقرب بس لازم مشية نهار لأنه منقطع شوي عكس اللي قبله
عن تجربه لاحد عوايلنا الطريق الثاني اريح وافضل
ومدامك بالسياره خليها 8 الكويت ونيسه ماشاء الله
احنا كنا 5 -----2 كبار و3 اطفال
بالعكس لازم ماتكون آخر مره راح تنبسطون ان شاء الله
بالنسبه لي
نصيحه الاكوا بارك لا تروح لها زحمه والشباب فيها كثير لو معك اولاد كبار معليه
او اطفال (مع ان حوض السباحه للاطفال مليان وفيه خدامات بملابس البيت يخوضون في المسبح ) تجربه مستحيل اكررها
روح قرية المسيله (على كلام صاحبتي الكويتيه انها افضل وخصوصية اكثر)
او اسكن اوتيل فيه مسبح او وديهم البحر اشوف عوايل كويتيه يسبحون هناك
مع ان الشاليهات قالوا لنا البحر ملوث ممنوع السباحه في البحر
صرفنا من المطار 13 ريال للدينار
سكنت في شقق فندقية تقريبا 250 ريال غرفتين ومطبخ مجهز عيبها حمام واحد ( بس نظيفه والستاف اللي فيها متعاون جدا وحبوبن وخدومين
ولو ميزانيتك كويسه ممكن تسكن في شاليهات قريبه مثل بالم بيتش او الرمال شاليهات على البحر روعه
تقريبا 700 800 ريال مع الفطور ل5 اشخاص
بالنسبه للمخطط امشي على شارع السالميه والبلاجات وشارع الخليج يعني على الكورنيش اي شي يعجبك ممكن تروح له
فيه المركز العلمي موجود فيه سينمما افلام للطفال وثائقيه وحلوه
وفيها زي سايتك بالضبط اللي يعلمون الاطفال فيه المخترعات روعه للاطفال
ممكن تتفطر او تتغدى او تتعشى بمارينا كريسنت مجموعه مطاعم على المرسى
وممكن تاخذ حلى او فطاير من المحلات هناك وتتقهوى على البحر
المولات عادي تتشابه مطاعم+العاب +سينما+ محلات
والمحلات تقريبا نفس الرياض واغلى شوي اذا تحبون تشترون (احينا التغير يفتح النفس للشرا)
الا مجمع [المنشرفي الكوت الفحيحيل يشبه المارينا كريسنت كجلسات على البحرهو تقريبا ابعد مكان عن الشقق والفنادق-الجلسه هناك ترد الروح
البحر والكورنيش والمطاعم والجلسات على البحر احلى
كنا نروح السينما في المول الظهر او آخر الليل
المباركيه سوق شعبي حلو ممكن تاخذون منه البهارات وحلويات كويتيه وبقصم
ولا تنسون تعشون فيه في مطعم شمم مدري الفهد كلهم واحد لا يفوتكم
وفيه على البحر بتلاقي مكتب مكتوب عليه شركة المشروعات السياحيه تستاجر منهم سفينه ربع او نص ساعه
وتجيب معاك اكلك وقهوتكم او شاهي وفيه جنبها كوفي صغير تاخذ من عنده مويه سلاش كوفي خفايف
مره روعه
ممكن تدخل جوجل ايرث وتشوف الفنادق اللي عند البحر وتشوف كيف الطرق
البحرين احلى مافيها واهو المائيه وجنة دلمون - سيتس سنتر الجديد
كلنا خليج واحد بس لو خيروني اختار اروح الكويت وما اروح البحرين
طبعا المدينه الترفيهيه ما امداني اروح
والملاهي الثانيه شفت صورها
بالنت ماتشجعت ذكاتني بملاهيات الثمامه فقلت ماله داعي لأني ماطولت ابدن
الميزانيه حسب اذا انتم تتسوقون او المطاعم
تفرق من عايله للثانيه
اي شي تبونه انا بالخدمه

حمامة الرياض
حمامة الرياض
اضافه
كم اعمار اطفالك؟
كنت باضيف انك مكن تسكن بشاليهات اليومين الاخيرين
اطلع الصباح اخف زحمه شوي واطول وقت-الضهر ممكن تروح سينما لأن الافلام هالوقت حلوه للعوائ خصوصا الاطفال
ممكن تاخذ نت محلات الفطاير المنتشره زي خباز -سابليه-كنافة كنفاني - مثل اوبرا وسنابل السلام والمملكه و هالمحلات
تتقهون عليها
بالنسبه للاكوا بارك اذا اطفالك كبار على مسبح الاطفال ما تقدر تخليهم لحالهم لأنها من جد مليانه شباب
وبالنسبه للطريق فيه في المنتدي مواضيع تكلمت عنه وبالتفصيل


خصم يصل إلى 25%