مانيلا المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
فهد330
05-12-2022 - 11:15 am
السلام عليكم ورحمة الله وبركاتة
اليوم الثاني لي بتكلم عن ( السفارة و العيادات )) بشكل عام ومختصر واسف على التقصير
اليوم زرت السفارة السعودية بمكاتي عشان اسجل جوازي واستفسر عن العيادات
بصراحة حسيت اول ما دخلت ان السفارة تختلف عن السفارات السعودية الي زرتها في سفراتي الماضية في بعض البلدان الاسيوية والعربية يعني الاستقبال حلو ولكن
وبصراحة تغير الوضع بسرعة وعرفت ان ربعنا مهما حصل مايتغيرون
نفس الشي استقبال حلو اول 5 دقايق بعدها ما عندك احد
اسأل موظف السفارة عن عيادات الاسنان يقول ما اعرف الا وحدة وغالية
صلح بالسعودية اصرف لك يعني انواع الاحباط
قلت طيب شف معي هذي الاسماء حوالي 5 مراكز وش تنصحوني بينهم
قال ما اعرف عنها شي
واشوفه يكلم خوية يقوله برسلك 2 من الجماعة ضبط امورهم
قلت والله السعودي مدمن واسطة حتى بالفلبين
حسيت اني داخل مرور الناصرية مو سفارة
الله يخلي لي حبايب قلبي منتدى العرب المسافرون الي زودوني بالمعلومات
واصبح المنتدى السفارة الحقيقية لي وانا بالخارج
((( بالنسبة لاسماء العيادات عادي اكتب اسمها او ممنوع ارجو من احد المشرفين التوضيح لا هنتو )))
وطلعت وربي محبط قلت مالي الا الف عليهم بنفسي لاني مسجلها بورقة
رحت الاول ما عجبني سعرة ورحت لثاني مقفل العيادة وسألت متى يفتح قال له فترة مقفل
قلت طيب الثالث الي كنت ارسل لهم اميلات
واخذ الوصف والرقم وشيك معاهم عن طريق الريسبشن بس دون فائدة الي فهمته منهم
ان العيادة خارج مانيلا قلت والله ضعت يابوالفهود مالك الا الرابع ورحت له
دخلت وشيك على كامل قال تحتاج لسمكرة 20 سن وسعرة افضلهم وسمعته طيبه
حتى عند الرسبشن قالو معرف الدكتور
وتوكلت على ربي وبديت اليوم العصر
سدحو لي ضرس وسمكرو 2 في اول جلسه
قلت الله يعين بدايه موفقة والمدة تقريبا 10 ايام
الله يسهل علي الامور وأصير زي سنون هذا المبتسم
اخير على السريع
الفندق الي ساكن فية الي هو A. Venue Hotel Suite
حبيت اجدد عندهم قالو ب3600 بيسو
اذا اسبوع بيصير على الليلة ب3000 بيسو السعر حليو
قلت طيب واشيك على بوكينج طلع اغلى من الفندق نفسة
ودقيت على ديبي قلت بشوف وش سالفتها ردت علي وقالت ب 3800
يعني ديبي اغلى من الفندق واغلى من بوكينج
وبصراحة عيب الفندق فطورهم الله يديم النعمة احس اني بعصقل من ذا الاكل
والنت بصراحة غشوني لاني سكنت على اساس النت مجاني على طول
بس طلع لك 4 ساعات في اليومين
طبعا شيكت على الفندق الي جنبه __ Antel Spa Hotel Suites __
ودخلت الفندق بصراحة نظيف وقريب جدا من مستوى افينيو ونفس سياسته من حيث النت
و وسعرة ب3400 بيسو يعني يفرق عن الافنيو ب200 بيسو
وسامحوني اذا في تقصير والله اكتب لكم وانا يعلم الله اني اعاني من الالم السمكرة حقت اليوم
ولكن هذا واجبي وحق علي للمنتدى الراقي
بارك الله فيكم ودعواتكم ان الله يسهل على الامور
هذا الي عندي وبحاول كل ماصار معي شي جديد احطة ((بنفس هذا الموضوع))
وعذروني وسامحوني على التقصير
اخوك فهد 330


التعليقات (9)
بوردنق بسرعه
بوردنق بسرعه
اخوي فهد انا حالين بالفبين صراحه طرحك مافيه مجامله وكثير من الاخوان يجملون المواضيع ليسترو عيوبهم او اخفاقاتهم
كل سفره وله علقه تعلم منها
ترى السكن في مابيني حلو رخيص والامن تمام جدا اهم شي اعرف وين ومتى تبيتروح وارخص من مكاتي بكثير والامور ترى امان بمان مو مثل ما صور الاخوان ان الامن هاجس بالفلبين حليلهم طيبين على الاخر بس بعضنا خوافين وحساسين من الامور الي ما هي عندنا بالديره والسلام والله يساعدك ويتمم سفرتك على كيف ما تبي

(العاطل)
(العاطل)
اخوي فهد رح للملحق الصحي يمكن يفيدونك بخصوص عيادات الاسنان
تحياتي

كلومينا السعودي
كلومينا السعودي
شوف وانا اخوك انا اعرف عيادة اسنان ممتازه وانا مجربها بنفسي ..
عنوانها في نفس فندق شنقرلا اللي في مكاتي .. الدور الارضي ..
روح شوفها وتقدر تسأل عن السعر هل يناسبك او لا ..
اتمنى لك التوفيق

bandar1404
bandar1404
فهد ياليت تذكر كم سعر تلبيس الاسنان الاماميه الضاهر اني بلحقك وتذكر اسم المركز الي عالجت عنده او تسدح رقم التلفون

فهد330
فهد330
(العاطل)
علا وغلا بالغالي
والله المفروض السفارة تدلني على الملحق الصحي والله مادريت عنه الا منك والمشكلة بعد مادفت نص المبلغ للدتور عساها خيره ويكون ذا الدكتور شغله زين الله يعين ويسهل
الله لا يحرمنا من طلتك الحلوة ياخلفهم

فهد330
فهد330
كلومينا السعودي
تسلم يابعدي
ياليت مشاركتك كانت بدري يومين بس الحمدلله على كل حال خلاص مايمدي اغير لان بديت عن الدكتور
والله يجعله خيره يارب على العموم اشكرك ويمكن يستفيد غيري من الدكتور الي انت رشحته باين انه ممتاز لان مكانه جدا راقي مثل شخصك الكريم

فهد330
فهد330
bandar1404
هلا اخوي بندر حياك
ما اقدر اعطيك رأيي بالظبط لان مالي الا يومين عند الدكتور
يمكن اذا خلص اعطيك خبر
وشف الدكتور الي فندق شنغرلا اتوقع انه ممكتاز لان مكانه جدا راقي

كلومينا السعودي
كلومينا السعودي
الله يجعل فيه الخير والبركه ..
على العموم هي دكتوره وكبيره تقريبا عمرها فوق 50 سنه وخبره ..

sad92sa
sad92sa
الله يجعل فيه الخير والبركه .. وسلامات ما تشوف شر
ربي يحفظك وين ما كنت


خصم يصل إلى 25%