Yamazaki
12-12-2022 - 05:45 am
السلام عليكم ورحمة الله وبركاته
اخبار الجميع ان شاء الله تمام
المهم احنا هالصيف ان شاء الله بنروح استراليا
بس بنروح ملبورن انزين ,, في ملبورن الاماكن الي نبيها
تقريبا اشويه فالمده ماتستاهل تكون اكثر من اسبوع بس
فكرة يعني الحين تازمانيا يقدرون يروحون لها من ملبورن كم
المده من ملبورن لين تازمانيا وعن طريق شنو ,, وكم التكلفه
+ يصير نروح لها الصبح ونرجع الفليل بدون مانبات اهناك ؟
وجبل بولر اشلون تروحون له من ميلبورن وعن طريق شنو وكم
التكلفه وهل تسكنون في جبل بولر ولا تروحون وعقب ترجعون ؟
وهل في اماكن حلوه ثانيه في ملبورن بس مابي Shopping ولا museums
ولو ممكن ابي الرد يكون سريع اليوم لين باجر لأنه خلاص باجر بنقرر
والله يعطيكم العافيه
على العموم
ملبورن فيها اماكن سياحيه مثل ماقلت قليله بس فيها
رحله القطار القديم
رحله الثلج
رحله البطاريق
رحله القريت اوشن رود
رحله مع غداء او عشاء في نهر الياراا
رحله اقدم سجن في ولايه فكتوريا
ممكن تزورون الحديقه والمبنى الملكي و مبنى البرلمان
المجمعات فكتوريا واركاديا
مبنى يوريكا اطول مبنى في ولايه فكتوريا
ستاد الكريكت
اي اوكلاند مثل اي لندن
منطقه اوكلاند منطقه جميله وتعتبر مارينا وراقيه ..
وبخصوص جبل بولر انا كنت مخططه نقعد فيه 5 ليالي خاصه اني ولا مره صادفت ثلج في حياتي بس الله ماكتب
اذا بتروح عن طريق الشركات السياحيه وترجع بنفس اليوم تقريبا 120-200$ للشخص
واذا بسياره خاصه وناوين تقعدون هناك انا سالت كم شركه سياحيه وكلهم قالوا لي 1800$ روحه ورجعه
والمنطقه تبعد عن ملبورن 3 ساعات تقريبا ... والسكن شوي غالي هناك خاصه في منتجع Arlberg يعتبر من احلى
المنتجعات والفنادق هناك ومطل على ساحه التزلج يعني تطلع خطوتين وتلقى المدرج ..
الفندق غالي ماينفع الا لاصحاب الميزانيه العاليه والمفتوحه
تسمانيا تقدرون تروحون لها عن طريق الطيران الاقتصادي جت ستار - فيرجن بلو - تايغر
تقريبا سعر التذكره للشخص الواحد 39$ وفوق .. والمده بالطياره ساعه وربع تقريبا
وتنزلون في مطار Hobart.. عاصمه تسمانيا
http://www.tigerairways.com/
وفي طريقه ثانيه بالفيري تطلعون من ميناء وسعرها اغلى من من الطيران الاقتصادي تقريبا 100$ للبالغ وفوق حسب
اذا تبون كبينه مشتركه او لا وغيره من المميزات ..
وهذا موقع الفيري
https://www.spiritoftasmania.com.au
الافضل تقعدون فيها كم يوم على الاقل تحللون فيها قيمه روحتكم وجيتكم واعتقد في رحلات مع مكاتب سياحيه لها تروحون وترجعون بنفس اليوم مش متاكده ان شاء الله الاخوان يفيدونك اكثر