dreamy
06-12-2022 - 01:09 pm
مرحبا جميعا وخصوصا الناس المتواجدين حاليا في زيلامسي، انا كنت من حوالي اربعة أيام في النمسا وتحديدا زيلامسي، كنت راجعه انا وخواتي من رحلة الزحليقه الصيفيه وكنا تعبانيين وايد فقلنا خلينا نسير مطعم انطونيو اللي قرب الكنيسه اتوقع الكل يعرفه اللي فيه قعده فوق، المهم كنا هلكانيين من اللعب في الزحليقه.
طلبنا اكل وكلنا وكالعاده صاحب المطعم الهندي او اعتقد بنغالي كل شوي يمر علينا ويسألنا عن الأكل وغيره المهم خلصنا واحنا طالعين انا كنت حاطه الكاميرا مالتي عالطاوله ونسيت آخذها معاي وطلعنا على طول مشي للفندق واحنا في الفندق تذكرت انها اهناك وقلت لخواتي بنريح وبنسير عنده لانه ريال طيب واكيد محتفظ بالكاميرا معاه.
ريحنا وسرناله وسألناه عن الكاميرا على اساس انه موجوده عنده وارتبك وقام يقول كلام مب منطقي وبين الخوف عليه ويحلف انه ما شافها وقام يتلعثم في الكلام ومرات يتكلم في التلفون على غير عادته ويعلي صوته وينكر طول الوقت لدرجة انه احنا افتشلنا من الزباين اللي معظمهم خليجيين مثلنا وقلنا له خلاص ما يخالف مع اني متأكده مليون في الاميه انها معاه واللي عور قلبي في الموضوع كله انه هالكاميرا غاليه علي خواتي مآخذينها لي في عيد ميلادي شهر 5 اللي طاف وكنت مصوره فيها رحلتنا للزحليقه وفي ذكريات كم يوم في زيلامسي، المشكله اني ثاني يوم الصبح بدري كنا انا وخواتي حاجزين قطار انسير فيه لزيورخ حسب جدول الرحله وقبل لا انسير محطة القطار سرت اشوف لو كان فاتح وطلع مسكر، في الليله اللي سرق فيها هالهندي كاميرتي ما عرفت ارقد وتميت اصيح طول الليل خصوصا يوم شفت حسرة خواتي على صورنا اللي كلها راحت وقلبي اتقطع لاني بعد ما ارجع البلاد بسافر دراسه امريكا وما بشوف خواتي فترة طويله، خواتي اللي يمثلون كل شي في حياتي، هالهندي سرق ذكرياتي مع خواتي.
عندي طلب من الاخوه اللي موجدين في النمسا حاليا وفي زيلامسي ويشوفون موضوعي، طلبي صعب بس ما بنساه لكم طول عمري انه اتحاولون تسألونه هالحرامي عن كاميرتي وحتى لو طلب فلوس مستعده ادفع بس ارجع كاميرتي وذكرياتي مع خواتي..
أدري طلبي صعب وشبه مستحيل ووايد منكم بيقرون وبيقولون اني اطلب المستحيل بس مافي شي اسمه مستحيل على رب العالمين، مواصفات كاميرتي موجوده في هالويب سايت هي لونها أزرق كحلي اللي يشوفها يقول سوده لانها غامقه وايد وشكلها بتشوفوه في هاللينك لاني ما اعرف انزل صور.
http://www.imaging-resource.com/PRODS/TX7/TX7A.HTM
اللي يفكر يساعدني يراسلني على الخاص وما بنساه له هالمعروف طول عمري.
انا بسافر بعد 3 ايام امريكا بس بكون متابعه الخاص.
مطاعم النمسا
والله سالفتك ذكرتني بسفرتي لماليزيا صيف 2007 توي مشتري جهاز نوكيا n95 توه نازل وانسرق مني بمول وانقهرت المشكله والله ماعلي من الجهاز كنت مصور فيه احلى مافي السفره إلا اليوم هذا مقهور ع الصور ..
انسي اختي صدقيني مابي احطمك ولكن مستحيل يرجعها لانه يفكر يبيعها وياخذ فلوسها وتمتعي برحلتك إلى امريكا وصوري أحلى منهم تمنياتي لك بالتوفيق