- (هذي الصوره تذكرني بلعبة المنيبولي )
بداية اشكر كل من شجعني وساعدني بمعلومه سواء كانت مهمه او غير مهمه
وهذا اقل شي ممكن اقدمه له قطفتها خصيصا من حديقة الزهور
الرحله اعتبرها فلم اكشن فيها رعب وخوف وسعاده وعجب وندم ورومانسيه والمشاعر كلها ممتزجه
في وقت متأخر قررنا نسافر لاندونيسيا وكلو من بركات تشجيعكم وبسبب تاخير القرار كانت التذاكر بالواسطه لان الرحلات كلها فل الشخص الواحد منا ع الخطوط السعوديه 2400ريال
في مطار الملك خالد الدولي الشغالات على أفا من يشيل وعند اعلان الرحله اخترشو الشغالات وتدافعو الكل يبي يكون في المقدمه قلت خطي حرام عطي الحر فرصه وخليني في الاخير المقاعد ماراح تطير وصفيت اخر وحده
موظف الخطوط لاحظ مكاني وجابني اول وحده ،التفت ع الشغالات وقلت تشب ولاكلمه اللي ماتصف زين والله لارجعها لعمتها خ انا الى الان بالسعوديه
من الرياض الى سنغافوره الى جاكرتا
والان اربطو الاحزمه واستعدو للاقلاع معي في هذه الرحله
(هذي الصوره تذكرني بلعبة المنيبولي )
نفس الصفه في المطار كنت اخر وحده وماعندي مشكله الكل راح يختم جوازه جاني الموظف وقال ثري هاندرد قلت نو تو هاندرد وراح رجع وقال تو هاندرد قلت نو ون هاندرد خ راح ورجع وقال ون هاندرد وعطيته وكرش الشغالات وجابني اول وحده بصراحه ماحبيت تصرفه في احتقاره لهم بس قلت اكيد تعودو على هالشي
استقبلنا سواق كان موصيه خوي زوجي علينا وشكله كان نايم في المطار ينتظر الفريسه اول ماشافني قال اسم زوجي قلت اشتغل الدنبوشي بسم الله وش يعرفه هالسكني انه احنا
بصراحه من الفرحه فيه بغيت اخمه ولقطنا وكان كانه مرتب كل شي حسيت انه متفق مع الشله حقينه اقصد ودانا لصرافه معينه ولطشت منا 100 دولار وقت الصرف وماحبينا نتشاكل معها ونلفت الانظار وقلنا العوض على الله وكان كل ماجيت اطلع شي من شنطتي يقط ابو الشباب ماادري انا اطلع الحاجه والا اطلع راسه من الشنطه
غثنا هالحرامي وقال انا ادل كل شي قلنا يالله اهم شي يتكلم عربي جلس يلف بنا في حواري جاكرتا بالليل كانها شيكاغو يجي حوالي ساعتين مايدل الفندق
وزوجي عصب انا اقول له اصبر ياابن الحلال اهل جاكرتا ادرى بشعابها وهو يسمعني اقول له اصير ويقول اسبر اسبر موهمد وانا بنفسي ودي ازنطه من عقب الخمه كنا متفقين معه على 450الف روبيه مع الضرايب والبنزين وبالطريق كل شوي يقول عطوني انا ماجبت شي قلت اوكي بس نخصمها عليك بكره
بعد ساعتين وصلنا للفندق بعد مادلنا صاحب دباب ماشي ورانا طبعا واخذ حقه ولما وصلنا الفندق قال السواق عطوني فلوس انا جوعان كرشناه وقلنا اذلف لانشوف رقعة وجهك جعلك الجوع اللي يقطع ضلوعك
وصلنا للفندق وكان اختياري غير موفق لاني من السرعه في مكتب كاها في المطار لقيت هذا ارخص واحد ب350 ريال ولما جيت لقيته جناح خايس كبير واسم الفندق( السون )طبعا تذكرت ان كثير كانو يمدحونه بالمنتدى وقلت يمكن الكلام قديم
لقيت سعوديات بالفندق وقلت لهم بصراحه احنا ماتوفقنا بسواق كويس قالت هنا برا تلقين سواقين كثير قلت لا انا اهم شي يكون عندي امين قالت كلهم امناء ماشاء الله عليهم قلت يانهار مش فايت شكل الدعوه عندها فري السلام عليكم
بصراحه مااخفيكم وقتها ندمت اني جيت هنا وكل شوي اتهدد السفاره بس الحمدلله فكهم الله مني
رميت نفسي ع السرير الوسخ وقعدت افكر في بكره
طبعا ماصورت من جاكرتا شي عشان مااتذكر الذكرى الاليمه
الساعه 8 الصباح توكلنا على الله وطلعنا ولقينا !!!!!
في الحلقه القادمه اقول لكم وش لقينا
انتظروني
اختكم :ودها بس حصل لها
بأنتظار الاجزاء القادمة بأدن الله تعالى ،،،