نكمل لكم ............
نسيت اقول ا الرحله كانت العام الماضي و تحديدا 3 شعبان الى 21 شعبان ولم اكن اتوقع حينها ان تكون من احلى الرحلات و امتعها عل الاطلاق. حجزت عن طريق النت على الخطوط السعوديه ( انتبه اذا حجزت بالنت ما يأخذون بالحسبان عضويتك في الفرسان) وهذا غبني جدا جدا
والمشكله اني ما دريت عن هالمشكله الا السنه هذي هحم ماجاك الا هذي يعني
المهم التذاكر كلفتني يالأحباب 11 الف تقريبا 3 كبار و 4 اطفال ولحظتها قلت الله يستر من اللي قدام
للحديث بقيه................................

------------
تقرير واضح من عنوانه وبدايته انه ابداع قادم ,,,
سجلني اول المتابعين لك ,,,,,

1. طارت الطياره وكانت فل ال فل اقصد مليانه لا يا شيخ

اكملكم السالفه...............
كانت الرحله (الرياض /كولومبو /الرياض) ووقت الرحله متأخر شوي الساعه وحده صباحا وكانت في وقتها بدون تأخير احم وش قصدك

طارت الطياره وكانت فل ال فل اقصد مليانه لا يا شيخ

العوائل السعوديه كان لابأس بعددها رغم أنه في ذالك الوقت كان الخوف من مرض انفلونزا الخنازير لا زال مسيطرا على العالم بأسره فما بالك بدوله مثل التي كنا مسافرين لها , شغالات سوواويق كله كله المهم استانسنا في الرحله خاصه اذا معك طفل اول مره يسافر يعني احساس رأئع وجميل وما أن وصلنا الى تلك الجزيره حتى
راينا العجب غيوم عجيبه والارض خضراء بشكل خرافي جدا جدا جدا حتى البقع الفاضيه كان لونها احمر مما يدل على الامطار وشكل اشجار النارجيل جميل من الجو سبحان الخالق .....................
نزلت الطياره ودخلنا المطار على انه صغير بس مرتب و جميل جدا جدا الاستقبال ممتاز وعندهم كاونتر فيه بنات يخدمونك يكملون اوراق الوصول استعدادا لكاونتر الجوازات وانصحك اذا معك عوايل اختر الكاونتر اللي فيه حرمه لانها بتطلب من الحريم يكشفون بعد الجوازات اللي ما اخذت ولا 10 دقايق وبتقولون مبالغ بس هذي الحقيقه انطلقت لاخذ الشنط طولت شوي ثم الى الصاله الخارجيه اللي فيها مكاتب تأجير الفنادق والبكج بشكل عام وياكثرهم يشغلونك ما تقول الا انك في البطحاء وهذا يناديك وهذا يلحقك وهذا المهم انا كنت منسق من قبل من الرياض مع مكتب و موقعه في المطار ايضا لكن مناقشه في الاسعار والمناطق وما قصروا الزملا ءاللي سبق لهم زيارة .
نكمل بعدين ............................... تابعوني ,,,,,,,,

سلام
اكمل لكم وين وصلنا وين وصلنا .........ايه عند مكتب الفنادق الحقبقه نشفت ريقه وهو بعد نشف ريقي اللي اتفقنا عليه ان يكون البرنامج كالأتي ( كولومبو _ فندق التامريند ومعناها اللي عرفته بعدين ( التمر الهندي ) و الله العضيم وتبي تتأكد قلهم في الفندق وش معنا التامريند _ لمده يومين ) بعدين ( بنتوتا _ فندق الأيدن وأأأأأأأأأأأأأأأخ يا بنتوتا ديره _ مابغوا الاهل يطلعون براحه لولا ارتباطنا ببرنامج وجلسنا فيها 4ايام )وبعدينا طلعنا للمرتفعات
(نوراليا فندق الجراند وكانت 4 ايام ايضا ) ثم كاندي فندق شايا سيتي دل 4ايام ايضا ثم هبرنا 3ايام قرية الشايا ومنها الى دمبولا منتجع امايا ليك الله لا يعيدها
ليلتين ثم العوده لكولومبو التامريند ليلتين ثم المغادره وطبعا جميع الفنادق مع الافطار يعني برنامج متكامل ولكن خلافنا على السعر لانه قال ب 3800 دولار وانا رفضت وفي النهايه وافق على 3400 دولار خاصة انه بدون سايق لاني مرتب مع سايق يحبه قلبك مسلم ب 120 ريال في اليوم...................................واذا احد يبيه ما عندي مانع بعد أذن المشرفين الكرام
و للحديث بقيه............................................

يسعدني ويشرفني ان اكون من متابعي رحلتك المشوقة

بل انا اللي اتشرف بان تكون من متابعي مقالي هذا يا اخي انين الحزن بس على فكره تراك حزنتني بلقبك هذا
احم امزح ................

كنت اخر شي وقفت عند المكتب بالمطار يوم قعدت اتلاجد معه و بالاخير اتفقنا على 3200 الفندق مع الافطار للمناطق اللي ذكرت مسبقا ودفع محاسيكم الدراهم كامله دولار ينطح دولار وبعدين رحت اصرف شوي دنانير قصدي دولارات لقيتها ال100دولار =14000 روبيه قلت ليتني جايب معي شنطه بدال البوك المهم اخذت عفشي و عييلي و طلعت برى المطار ولقيت السايق (فايز )حسب الاتفاق والصراحه انصدمت يوم شفت سيارته لاننا ولله الحمد متعودين على السيارات الزينه لومينا و انت نازل قصدي وانت طالع احم ..... المهم زينه وبس الحقيقه وش اقولكم باص تويوتا 82 ظفني انا وزوجتي و عيالي 5 وشناطنا لا و البوري يوم ظرب فايز بوري بغيت اتلطم صراحه بس تذكرت اني مالبست شماغ

1. سلام اكمل لكم ..........................


2. المهم في الطريق الى التامريند قصدي الفندق

سلام اكمل لكم ..........................

المهم في الطريق الى التامريند قصدي الفندق

تشوف العجب العجاب على اليمين و على اليسار ناس مشغوله هذا يبيع مانجا و هذا اناناس و ياكثر ما بتشوف من الاناناس و بعدين عليه طعم يم انتبه لسعابيلك لا تطيح لا والرامبوتان و الموز و المنقس شي شي شي من المزرعه لفم الزبون على طول والاسعار ماتتصور تقضيت بيديني و رجليني وفي الاخير ما صرفت ولا 30 ريال تصور 30 ريال لو انك في غير هالبلد كان اضرب هالمبلغ في 10 بدون مبالغه
مالكم في الطويله دخلنا الفندق وش هالفندق يا جماعه اول شي وقف السواق عند كوخ وعلى فكره كل الغرف في هالفندق شاليهات على شكل اكواخ , اول ماوقف ونزلت دخلت وتفاجأت انه الرسبشن لكن من دون لا باب و لا درايش بس مكيف فوق رأسك يالموظف :08ja6: اخوكم يطالع فوق يطالع تحت امسح بيدي الكونتر وين الغبار يابو الشباب الصراحه انبهرت
استقبلوني استقبال ممتاز فلان قلت نعم قالو تفضل مفتاح الشاليه رقم 6 غرفتين نوم كل غرفه 3 اسره طلبت سرير زياده لابو عدنان الفندق صراحه رائع و رايق و فوق ماتتصور هدوء اشجار طيور :0khws:اصوات اول مره في حياتي اسمعها اتضح لي بعدين انها اصوات السناجب :0qmpx:الله الله الله من زمان ما نمت بهدؤ ياجماعة الخير والله اني نايم على المسبح ماحسيت بعمري من شدة الهدوء .................................. للحديث بقيه