حياكم الله خواتي واخواني في بوابة مملكه البحرين
جاك ديسانج عباره عن صالون وسبا بالاضافه الي صاله رياضية معده بجميع الاجهزه الرياضيه
وحصص ايروبكس وسبننق وغيرها الكثير
(للنساء فقط)
طبعا جاك ديسانج معروف عالميا وله شهره وفروع في عده دول.. والمكان راقي ونظيف ويعاملونك معامله طيبه عندهم.
وموقعه يصير قريب من العدليه (اذا كنت جاي من فندق الخليج تخلي شارع العدليه على يسارك وتروح سيده بشوي تلقى المبنى على يدك اليسار...واهو يطل على قصر الضيافة)
بالنسبه للاشتراك في الجم لمده سنه واحد 400 دينار يقدر الواحد يستخدم الصاله الرياضيه والاجهزه ويقدر يسجل في حصص الايروبكس وبعض الحصص الثانيه
اما حصص اليوغا والبلي دانس وغيره يكون حسابه غير الاشتراك
واذا بغيت مدربة خاصه لمتابعتك بعد يوفرون لك وكل شي بحسابة
الاشتراك في الجم يسمح لك باستخدام السونا والجاكوزي وحمام البخار
بالنسبة للصالون هم شغلهم راقي ومرتب واسعارهم طبعا اغلى من الصالونات العادية
تقريبا اسعارهم مثل اسعار صالونات الفنادق
ولازم حجز
خدمات الليزر متوفره عندهم مع دكتوره
انيي لاهم شي واهو السبا
الفيشل عندهم روعه خصوصا الفيشل الي يكون لاعاده حيويه البشره ولمقاومه الشيخوخه
وطبعا الفيشل انواع والعامله الي تقوم بهالشي تخبرك بالي يناسب بشرتك وتنصحك فيه
والمساج بعد انواع ويريح لاخر درجه وانصح فيه وبقوه
طبعا لستت السبا طويله بس راح اتكلم عن تجربتي الشخصيه فيه
اول ماتدخل المبنى تلقى الرسبشن مع ترحيب من قبل العاملات
طبعا لازم يكون عندك حجز واول مايتاكدون من حجزك ياخذونك على غرفه اللوكرات حق تخلي اغراضك الشخصيه باللوكر ويكون المفتاح معاك
وطبعا يكون باللوكر روب وشبشب وفوط مع قبعه للشعر
من غرفة اللوكرات تنزلون على الحمامات وغرف التبديل
بعد ماتهيئ نفسك تتوجه لقسم السبا
طاوله الرسبشن بالسبا وتكون العامله الي حاجزينها لك بانتظارك
الغرفه الي يتم فيها تدليعك وتدليلك ...للفيشل والمساج
طبعا المكان كله على السبوت لايت والشموع بس الفلاش بالكاميرا مخلي المكان مسفر ووالع
مع ساعتين من الاسترخاء والشخير
ياخذونك على غرفه تسترخي فيها
ويقدمون لك شراب بارد ومنعش حق تصحصح
هذي الجاكوزي عباره عن حوضين
حوض ماي حار وحوض ماي بارد وبالاخص مثلج
غرفة السونا
حمام البخار
واخيرا
ترجع لتبديل ملابسك واخذ اغراضك الشحصيه
نعيما.....
ملاحظه للرجال
المركز يقدم كوبونات هدايا او الفوجر قفت
يعني لو تبي تهدي زوجتك هديه عباره عن مساج او فيشل تقدر تدفع لهم المبلغ ويعطونك الكوبون تقدمه كهديه
اسعار الفيشل يتراوح من 25 دينار وفوق
والمساج 20 وفوق
وفي كوبونات خاصه لاعياد الميلاد اتوقع سعرها 15 دينار تشمل بديكير او منيكير مع كذا خدمه
تقدرون تستفسرون من خلال الاتصال فيهم
رقم المركز
17713999
وجاك ديسانج معروف بشغله المميز ..