وعليكم السلام
أفضل المولات صعب لكن الاحدث حاليا من وجهة نظري ردسي مول ومجمع العرب
الاسواق الرخيصة للعبايات زي ماقلتي سوق البوادي وقريب منه سوق الحجاز
وفيه كمان في البلد عمارة الملكة ومركز المحمل
بالنسبة للمطاعم عندك الاندلس تجمع مطاعم زي فراديز وتشليز وروبي تيوزداي وغيرهم
وكمان في المولات فيه تشكيلة مطاعم حلوة
والافضل انك تاخدي جولة في القسم وترتبي جدول لأماكن قريبة من بعض خصوصا وانه زيارتك كم ساعة
وبالتوفيق

ان شاء الله بحاول اروح كل الاماكن الي ذكرتها بس اهم شيء عندي السوق
مشكور عيون جدة و ما قصرت

وعليكم السلام ورحمة الله وبركاته
حياك في جدة وان شاء الله تنبسطي
مثل ماتفضلت الاخت عيون جدة
عندك الاحدث رد سي مول و مجمع العرب
وعندك البوادي و الشاطئ للاشياء و البضائع الرخيصة
شارع التحلية فيه مجمعات كثير
طريق الاندلس فه مطاعم كثير
شارع الروضة برضه حلو

هلا أختى munati فى جدة
بالنسبة للعبايات أفضل جداً إنك تروحى البلد (عمارة الملكة وماحولها)
بالنسبة للمطاعم شارع الأندلس هو المتخصص فى المطاعم الأمريكية ، ولايفوتك تشيليز وروبى تيوزداى ومنهاتن فيش ماركت.
بالنسبة للمولات روحى رد سى مول ..
وخلى الترتيب زى ماكتبتلك ..

مسلمة لله
مشكورة مسلمة بالله
جزاك الله الف الف خير

شاعرى
ثانكس شاعري على الترتيب وخصوصا محل العبايات و الشيل
ما احب و لا اطيق ابدا مطعم تشيليز ما اعرف ليش
دمار بالنسبة لي
بارك الله فيك
دمتم بود

حياك الله أختي الكريمة في بيتك الثاني
مافيه زيادة عن اللي قالوه الإخوان لكن حبيت أضيف
بالنسبة للأسواق فهي في جدة كثيرة
فإن كنتي تبغين سوق لأقمشة مثلاً فمجمع الشرق في شارع المكرونة هو بغيتك
إذا بغيتي أسواق فيها محلات الماركات فعتدك العرب مول جنوب المطار وهو أقرب الأسواق إلى المطار ,أو سوق رد سي مول طريق الملك شمال الكرة الأرضية
أو سوق الروشان مول غرب دوار الكرة الأرضية وكلها مولات تحتوي على ملاهي أطفال ومحلات ومطاعم
بالنسبة للأسواق الشعبية فسوق البوادي فيه كل ما تريدين ووصفه شارع الستين شمال دوار الفلك
و في وسط جدة منطقة (البلد) فيها سوق العلوي وسوق الندى وشارع قابل تحصلي فيها البضائع الشعبية والأقمشة الرخيصة والعبايات والطرح اللي تبغيها
وفي منطقة البلد عمارة الكورنيش الدور الخامس تحصلين العطورات بأسعار الجملة
وبرضه تحصلي الأقمشة في السوق المقابل لعمارة الكورنيش (نسيت أسمه)
وممكن تروحي لحارة المظلوم وسوق البدو في نفس منطقة البلد تحصلي ألعاب أطفال بسعر الجملة أو إذا حبيتي تشتري عسل كشميري من سوق العسل
عموما التمشية في منطقة البلد ما تمل أبدا وراح تنبسطوا فيها
أما المطاعم فجدة تشتهر بكم كبير من المطاعم
وأنتي طلبتي شارع بالتحديد وهو شارع الأندلس اللي يعتبر إمتداد لطريق الملك
وهو يحتوي على مجموعة من المطاعم
الأمريكية وأنصح بفدركرز (مع أنه ما عجب حرمنا المصون)لكن أنا والزملاء مدمنين عليه
فيه مطعم شيزان الهندي رائع جدا خاصة التكامسالا والبرياني (مدمنه عليه حرمنا حفظها الله ورعاها )
المطعم الايطالي يا ويح قلبي على الفوتوتشيني والبيتزا واللازانيا
والدمار المطعم الدوار (لوسيل)أكل إيطالي في أجواء رومنسية في أعلى عمارة السحيلي بجوار بنك سامبا مقابل مطعم فرايديز
وهذي صور المطعم
منتدى العرب المسافرون https://artravelers.com
لكن أعملوا حسابكم المطعم غالي يعني لشخصين 400 ريال بالراحة
بالنسبة للأكل والخدمة فيه إللي مدحة وفيه اللي ذمه
لكن أجمعوا على أن جلساته ما يعلى عليها
أتمنى اكون أفدتك
ولا تنسينا من دعائك