- السلام عليكم ورحمة الله وبركاتة
السلام عليكم ورحمة الله وبركاتة
اول شي بشكر كل من ساعدني على اختيار الفنادق و الرد على استفساراتي بدون ذكر اسماء لاني اخاف انسى احد ويعطيكم العافيه.. وراح اكتب تقريري بالعاميه لان لغتى الفصحى لكم عليها شوي..
هالسنة توقعت اني راح ابعد كل البعد عن شرق آسيا لعدة اسباب و سبق لي زيارة سيرلانكا وماليزيا وقلت باقي الدول اكيد نفس الطبيعه تقريباً .. جلست ادور في البوابات عن بلد يناسبنا كعائله ويشمل كل مانحتاجة من طبيعة و فئات فنادق و ترفيه واسواق .. دخلت بوابة اندونيسيا مع اني ولا مره فكرت اني بزور هالبلد جلست اشوف اغلب رحلات الاعضاء عزابيه بس لما تعمقت في التقارير لقيت تقارير لبعض العوائل حطيت قدامي السلبيات والايجابيات ودرست اسعار الفنادق والتذاكر قبل كل شي .. وتناقشت مع الاهل كالعاده رفضو الفكره بس مع محاولات الاقناع و الى فترة قريبه من يوم الاقلاع لم يتم القرار بعدها توكلنا على الله وجهزنا اغراضنا .. وكنت مجهزه جدول مسبق بالتواريخ والفنادق المختاره وطرق التنقل والمجمعات والاسواق والمطاعم الممتازه والاماكن السياحية وتم طباعتها..
كانت الرحلة على خطوط الاتحاد مع العلم اني اول مره اجربها بس الكل مدحها لي .. كان خط الرحله الدمام _ ابو ظبي _ جاكرتا
كانت الخدمة في الطائره ممتازة و كل شي ممتاز الحمدلله وصلنا الى مطار ابو ظبي الذي ابهرنا فيه من بعد مطار الملك فهد وانتظرنا تقريباً ساعه والصدمه بعدها في مطار جاكرتا الذي كان بدائي جداً حتى سيرلانكا دولة افقر منها مطارها احلى بواجد ..!! هذا اول استقبال كان لنا بعدها صفينا طابوور طوويل عشان الفيزا خلصنا من هالطابور وطبعاً الكل كان يطلبنا (( هديه )) تشائمت لما شفت الشعب كذا وخصوصاً السواقين وطمعهم كان كل الي بخاطري يارب يطلع الفندق ممتاز عشان انا الي مخططه كل شي وشفت خيبة امل على وجوه اهلي لان بداية الرحله كذا وصلنا بعدها الى Mercure Convention Centre Ancol تم اختيار الموقع بدقة لانه اقرب للمطار و قريب للبحر لان اول يوم كنت نبغى يكون الفيو للغرف حلو رحت للرسبشن وقلت لهم اني حاجزه وهذا رقم الحجز من booking.com
كلها دقايق عطوني مفاتيح الغرف ذهبنا للغرف كانت ستاندرد عاديه مرره وكلمت الرسبشن سألتهم ابغى اسوي اب قريد للغرف بس قبل ابي اشوف الغرف الثانيه عجبتني الغرف الي على المحيط كانت اوسع بواجد وفيها جلسه وتطل على المحيط و هواء البحر كله يدخل الغرفه وتسمع صوت الامواج كانت فرق عن الغرف الاولى ...
مميزات وعيوب ميركيوري اول شي مميزاته انه قريب البحر وفيه مطاعم قريبه منه وعيوبه انه قديم ومستهلك..
رتبنا اغراضنا وطلبت من الرسبشن رقم بيتزا هت و طلبنا منه وجانا الفندق بس بصراحه مااعجبنا بعدها حاولت احجز رحلة لبالي في اليوم التالي الي هو 14 اوقست بس ماقدرت اشبك النت واستسلمت للنوم وفي اليوم التالي نزلنا للفطور كان الفطور جيد جداً بعدها اخذنا لفه في حديقة الفندق وانتظرت المكتب السياحي الي في لوبي الفندق يفتح وحجزت من عنده لان عن طريق النت اطلبو مني ايداع ولا يقبلون فيزا !! رحت للمكتب وحجزت التذاكر على merpati airlines كان السعر غالي مع خدمة المكتب بس مااذكر كم تقريباً بس معليه اهم شي نروح لبالي لاني حاجزه هناك اول ليلة كانت الرحلة العصر..قبل الرحلة رحنا مول قريب مااذكر اسمه لاخذ بعض الحاجيات و شرائح الجوال رجعنا الفندق نسوي تشيك اوت ولقينا في اللوبي سواق حبوب اسمه بومب وهو الي رافقنا اخر الايام في جاكرتا.. وبعدها كنا نبي نتغدا رحنا ماكدونالدز الي في انشول ماعجبنا حسيناه مو نظيف طلبنا من السواق انه يودينا فرع احسن من هذا وودانا فرع جديد لماكدونالدز كان الفرع نظيف بس ماعجبنا الطعم بس مشينا حالنا لان شرق اسيا الفاست فود مو كله طعمه اوكي فيها .. ذهبنا للمطار وانصدمنا زحمه مو طبيعيه وحر و روائح كريهه وانتو بكرامه تعبنا بهذا اليوم بشكل مو طبيعي ماصدقنا على الله ندخل الصاله وننتظر الطائره هنا شفنا منظر سيء لبعض شباب الشعب السعودي الله يهديهم ماكان ودي نشوف هالمنظر واحنا في بداية رحلتنا!! انا ماعندي تعليق على هذي الفئة من الناس وكان رمضان قريب جداً!! الله يعين بس لان لو علقت ماراح اقدر اسكت!!
ركبنا الطائره وكان الطيران جيد !! وصلنا لبالي حوالي الساعه 9 ليلاً مع اتفاقنا مسبقاً مع سواق ليستقبلنا وانصدمنا ان مالقيناه ولما كلمه الوالد قال انتو تأخرتو!! قلنا معلييه لقينا برا شركة للتكاسي اخذنا منهم تكسيين كان واحد من السواقين طيب والثاني اخلاقه سيئه لاحظو ان هذي الايام الاولى لنا في البلد فكان للحين الانطباع سيء :112: وصلنا للفندق الي كنت خايفه قبل لانوصل له لان مرينا في حواري وحووسه بس الحمدلله شكل المبنى مطمن جداً وهو Aston Denpasar hotel and convention center تم الحجز عن طريق booking.com والحمدلله للحين ماخذلني هالموقع كان الفندق من حيث الاثاث والنظافه ممتاز جداً اخذنا سويتين سويت فيه غرفتين نوم وميني بار وصاله والثاني فيه صاله وغرفة نوم واحد كان الفندق شكله جديد بس فيه عيب واحد بالغرف ان فيه باعوض وقرص اخوي الصغير الله يحفظه وهم حاطين اله لطرد الباعوض بس مانفعت نمنا ليلة هاديه بعد هاليوم المتعب لان اهلي تعبو من التنقلات والحووسه وزي ماقلت لكم ايجابيات الفندق كل شي الا موقعه البعيد عن معالم السياحة انا حجزت ليلة واحده لان باقي الليالي قلت انا بشوف بنفسي الفلل وبحجزها !! كنت متوقعه اني بلقى حجز بسهوله !! صحينا الصباح وكان التاريخ 15 اوقست نزلنا للافطار وكان الفطور جيد .. ثم طلبت من الرسبشن تأمين تاكسي ورحت مع اخوي ندور فلل وكانو عندي اسامي واجد مسجلتهم وعطيتهم التاكسي الي طفشنا مايعرف انجلش الا يس ونو بس !! وكانت الشوارع مزينه لان الهندوس عندهم عيد وظلينا مسافه طويله نمشي يمكن ساعه وشوي عشان نوصل نوسا دوا.. وصلنا واول فندق شفناه تم اختياره الي هو swiss-belhotel Nusa Dua
وفي الحلقه الجايه ان شالله بتطرق لهذا الفندق الجميل بذكر كل تفاصيله واتمنى ان الحلقه الاولى تحوز على رضاكم ومعليه انا ماعرف اكتب زي العالم
وحمدا لله علي سلامه الوصول