- نعود للفندق
- السلبيات
مرحبا , تونا راجعين من سيرلانكا فحبيت أقول خلاصة وجهات نظرنا ( انا والمدام , المدام وأنا ) يعني الموضوع كتّابه مكس ..
في البدايه أشكر الاخ ارتكاز لانه طول باله علي ورد على اسألتي بموضوع الاستفسارات
نبدأ من المطار
كان اتفاقي مع مكتب عبدالعزيز قبل السفر بشهرين بحدود رسالتين أسبوعيا أقوله فيها تنبيهاتي والي أبي
والي ما أبي وأساوم على السعر , في الحقيقه زوجتي هي الي تولت هالمهمه بأسمي واخرتها يوم رحنا لقينا مكتبه
مافيه الا شخصين وعبدالعزيز مو موجود يقولون رايح بريطانيا
ونقوله حنا فلان يمين يسار الرجال ماعنده علم بي لكنه يقنعني اخذ برنامجي منه
وكان فيه مكتب جنبه يستميت في اقناعي ايضا وكل واحد ياخذنا شوي على جنب ويسفل في خويه
الي جنب عبدالعزيز كان اسمه اباناس ابانس او شي مثل كذا والمغري بعرضه انه قال قولو السعر الي تبون
كان الاتفاق على 8 ليالي 9 أيام يومين في كولمبو و2 كاندي و4 في بنتوته مع الهاف بورد
لكنه لما قال كذا خلاني أخاف منه .. لان مكتب لانكا ترافل عطاني 1900 وحنا متفقين في الايميل قبل على 1200
قلت له ماقاله الله فمان الله ونروح للثاني قال كم قالكم قلت 1300 قال اجل بعطيكم 1200 نادانا حق عبدالعزيز
وقال انا اقول شوفو سيارته أول واحكموا وارجعولي وانا اعطيكم ب 1300 ونشوف سيارة الثاني والاها صغيره بس ماتبعد عن حقت عبدالعزيز الي تونا ما بعد شفناها .. بس لان المدام تقول الثاني مانعرفه اما عبدالعزيز على الاقل معروف ووجه تعرفه ولا وجهن تجهله قلت شورك وهداية الله وناخذ من عبدالعزيز بس انا نبي غرفه كبيره في فندق تاج اكزوتكا لذلك قال 1350 وبدون عشا وترا منتب ضايعين لانه هناك فيه اكثر من مطعم في الفندق وخذو العشا منهم والا خذو غرفه عاديه ومع عشا قلنا لا خلنا بدون عشا ..
بتكلم اولا بخصوص الشركه :السواق بوذي .. ولا يتكلم عربي اسمه ترانجا ما يعرف الا شكرا وكيف الهال بس احنا علمناه كم كلمه
ولكنه رسمي ولاهوب وسبع صدر يعني صامت يودي ويجيب ويقولنا عن الموجود وبس ..ناوي يبدأ بزنس شخصي ويقولي اعلن عني
قلت له كانك شروا معزبك منيب معلن عنك لأن بقولكم وش سوا معزبه
نجي للديره
كولومبو ديرة وصخه عدد الكلاب متساوي مع الشعب والشعب مروح في الحقيقه .. وما تستاهل ابد الجلسه فيها
حتى للتسوق مافيه شي يسوى واحسن مافيها فندقنا سينامن قراند فندق رهيب
واحلى من الصور الي شفتها له قبل وبوفيهم حلو مره صحيح تقريبا ثلثه فيه خنزير
لكن بقية اكلهم منوع مو كله حار وفلفل زي باقي الفنادق
ومن ايجابيات الفندق مسبحهم أعجبني والفندق ككل راقي وفيه قناة دبي والعربيه في الدش وهذي نقطه تحسب لهم
اما من سيئاته بالنسبه لي مافيه انترنت الا بفلوس حتى في اللوبي مع انه اغلب فنادق 5 نجوم مجانا في اللوبي
اما كاندي سكنا في فندق ايريل ريجنسي فندق حلو بس مو مثل فندق كولمبو يعني 4 نجوم تخب عليه
ونظيف وتعامل الموظفين جدا رائع بشوشين صاحبين ابتسامه وخدمه سريعه ويسلمون عليك في الرايح والجاي ومتعاونين .. من ايجابيات الفندق عندهم شطاف في الحمام وبوفيهم مافيه اي مكونات للخنزير الغيت تماما قبل شهر على ذمة واحد من حقين المطعم يقول اغلب سكان الفندق عرب مسلمين والخنزير ما يلقى رواج هنا ووقفناه ..المكان الي فيه الفندق خرافي طبيعه ساحره وهذا يخليك تنسى سيئات الفندق شوي
وسيئاته اول مادخلنا فيه ريحة خياس في الغرفه اتضح بعدين انها ريحة جوز الهند
ثاني يوم خفت الريحه مادري هي اختفت والا تآلف الخشم معها .. ثانيا مافيه انترنت أبد حتى في اللوبي
لا يوجد الا في البزنس روم .. على كلام موظف اللوبي مع انه يطلعلي نت لين جيت اشيك من الغرفه بس يبيله فلوس
المهم البزنس روم غريفه صغيره بكمبيوترين وطابعه وفاكس والساعه ب 700 روبيه والسرعه جيده
لم يعجبني التسوق في كاندي واحنا مارحنا الا وسط المدينه ما اعرف اذا فيه غيره لكن الزحام الشديد والحر
والرائحه القبيحه وكثرة الكلاب جعلتني اكره المكان برمته واهرب منه سريعا
السياحه في كاندي بشكل عام لم تنال على اعجابنا عدا الطبيعه الساحره لكني انشد النظافه في الاماكن لذلك لم تعجبنا نهائيا سوا طبيعتها الرائعه
نعود للعامي
ما رحنا لا لحديقة الوروود ولا التوابل ولا معرض الاحجار الكريمه ولا مسرح الرقص
مسرح الرقص لاني لا ارغب بمشاهده فلكلور الشعب لاني اساسا مابي اختلط بالشعب حيث انه ماجاز لي
حديقة التوابل سبق لي زيارة حديقة توابل في اندونيسيا والتعرف على كافة انواع التوابل لذلك قلت انه يمكن ما تضيف لنا شي جديد فما رحنا لها
الورود لان الجو شديد الرطوبه في وقتنا وزابنين في الفندق اغلب وقتنا
رحنا لبحيره ترد الروح .. ورحنا لمساج
احب انوه بخصوص المساج هذا ... لاحد يلعب عليه سواقهم ويروح لمهم
يسمعون بالمساج .. الواضح انهم خمه متجمعين في فليله وماعندهم شغله وقالو بنصير نشتغل في المساج والمفروض يسمون مكانهم ( تدهين ) تعال تمرخك بالزيت وتوكل على الله
انا اقصد المكان الي جنب حديقة الافيال .. ماجربنا غيره
مافيه اي ايجابيات حتى سعره ماهو رخيص جدا
اولا مافيه نظافه في المكان الذباب والناموس والحشرات الصغيره تتطاير على كيف كيفها
والسرير ما يتنظف بعدك او قبلك يعني الي جالس قبلك مفصخ تجلس انت بعده
مافيه تكييف ولا مراوح
حاطين موسيقى صوتها متوسط ولكن يغلب عليها صوت نباح الكلاب في الخارج
وأهم سلبيتين مافيه خصوصيه المكان يتسكر بستاير وانا شخصيا دخلت على رجال مفصخ زلط ملط ونايم على بطنه
وطلعت بسرعه لكني شفت جسمه .. والمفروض يسكرون الباب ..
ثانيا البخار عندهم تدخل في شي كنه تابوت ويولعون دبة الغاز الي جنبه
ودبة الغاز جنبها دش السباحه المتواضع جدا وجنبها فيش الكهرب يعني التماس بسيط ويقبع فيك وانت داخل هالتابوت جالسين يبخرونك
نجي للزبده
المساج ما يعرفون له ابد بس يدهنون رايح جاي وشوي يسوون دوائر وشوي يطقطون بيديهم بس
انا جربت المساج التايلندي والاندونيسي اروع من ذلك بكثير المساج نصفه او اكثر من النصف يتركز على المفاصل وليس العظام والجلد المساج انك تتفكك ويروح التعب مهب تدهين بالزيت وبس
تافه مساجهم لاحد يروحله
المكان بدائي جدا
نجي لبنتوته .. وهي كانت المحك الأهم في تعاملنا مع مكتب عبدالعزيز .. أو الشخص المسمى ايكا ..
في تاج اكزوتكا فيه 4 نوعيات من الغرف .. تبدأ من الديلوكس .. اوركيد روم .. سوبيريا .. ستاندر روم وهي أقل الغرف
ستاندر روم وضع صورها بعض الأشخاص جزاهم الله خير الجزاء وفيه ايضا من وضع سوبيرا روم .. الغرف ككل انا ما اشوفها بفخامة الخمس نجوم لكن سوبريا أفضل من الستاندر من ناحية المطل .. لأن غرفتنا في الدور الثاني يعني تحت اللوبي يعني حتى مطلها ماهو زين
ثلث المطل أشجار والباقي بحر والأثاث متهالك الأبجورات ثنين ما تولع ولمفارش متنتفه الثلاجه حاره ولما ناديناهم قالو تونا مولعينها ويبيلها 3 أيام عشان توصل التبريد المطلوب .. قلنالهم يعني لين سوينا تشك اوت تكون بردت ؟؟
قالو بنوفر لكم ثلج كل ماطلبتو ببلاش .. الغساله ما تمشي مويتها مسكر الفتحه ونادينهم وجلسو يحوسون فيها واشوا صارت تسرب
المروش صغير جدا وقديم .. بالعربي الغرفه أي كلام ومش حالك .. صارت مشكله كبيره مع ايكا وتلاعنا مع بعض بالتليفون
وقال لنا هذا الموجود هذا مطل زين وانتم تبون مطل زين !! وكانكم تبون غرفه زينه ورا ما كتبتو كذا بالعقد
قلنا ماعد نبي غرفه بس نبي عشا وش هاللعب .. وبرضو قال ماقدر اعطيكم عشا واعتذر وسكر وضاع اليوم الأول واحنا محملين بالغضب الشديد
تجاه المكتب ..
الي كمل الموضوع اننا قابلنا لبناني هناك أخذ أفضل غرفه في الفندق وهي الديلوكس وفي الدور السادس ومطلها أفضل من غرفتنا
مع الافطار ب 125 دولار فقط لا غير من موقع في الانترنت .. وهذي كانت القشه الي قسمت ظهر البعير .. وأخذت عهد على نفسي
اني ما أتفق مع أي مكتب سياحي مستقبلا واني أحجز جميع الفنادق من الانترنت بأفضل الاسعار وافضل العروض ..
ثاني يوم لنا في بنتوته قررت أنسى السالفه واستمتع بوقتي في الفندق .. الفندق كما قلت يصنف 3 نجوم وليس 5 نجوم
والي يبي يعرف درجته صحيح يدخل موقع اكسبيديا ويشوف تصانيف النجوم للفنادق بكامل مصداقيه .. هذا ظلم بحقه 5 نجوم أو حتى 4
وولانصاف أنا بقول الايجابيات والسلبيات الي رأيتها والله على مع أقول شهيد
الايجابيات الشاطى الرائع حيث كان الموج مررتفع جدا في وقتنا والالعاب المائيه متوقفه لهذا السبب
ومن ايجابيات الفندق ان اول يومين لنا ما كان فيه سعوديين الا حنا وناس ثاننين وهي انا اعتبرها ايجابيه لكن اخر يومين ابد
كنك في الهاف مون السعوديين اقتحموا الفندق .. الله يحفظهم .. وهذي من ناحيتي سلبيه حيث تنعدم الخصوصيه وحيث ان بعضهم يفشلون .. جلسنا آخر يوم عند المسبح بعد الفطور ويجي احدى الاطفال طلع من المسبح ويركض لأبوه يقول يبه يبه حسران
ويرد الأبو : دوك وانا ابوك المسبح وش كبره بل فيه !!!
الشوارع في بنتوته نظيفه ومرتبه وحتى الشعب
نعود للفندق
السلبيات
النظافه مافيه نظافه يشهد لها .. حول المسبح تتمشى السناجب والقطط متى أرادت .. داخل الغرفه تتمشى النمل الصغير بكثره لو تركت أكل معين فوق التسريحه ولاحد يقولي ايه ذي غلطتك لأني سبق وتركناها في فندق داخل جزيره ولا جاها الا العافيه . شفنا صرصورين صغار في الحمام
انا مادري هو حظنا شين والا الفندق كذا لاني ما سبق وشفت في التقارير طاري للنظافه .. ايضا في البلكونه شفنا أكثر من ضاطور ( بريعصي )
يمكن الفندق 5 نجوم بس كان كذا أيام 1998 لكن في 2009 مستحيل .. سبق وسكنت الشيراتون في الخبر قبل 10 سنوات كان نفس الاثاث
على الشاطى الحلو الي برا مفترض يكون فيه فندق يتجاوز هذا فخامه ونظافه خصوصا لان سعر هذا ماهو رخيص او مناسب لدرجته
العيب الثاني ان الموظفين ماهم بشوشين طوال الوقت ويرحبون فيك مثل ايريل ريجنسي الي يعيد عليك صباح الخير كل ماشافك صباحا
ومن هالمنبر أنا أنصح جميع المسافرين لسيرلانكا انهم ما يتفقون مع شركه سياحيه وان احتدو لا ياخذون منهم الا السواق
اما الباقي ياخذونه من النت أرخص لهم وأفضل تحدد كل شي وش تبيه ..
وفي الختام رأي الشخصي في سيرلنكا أعجبتني كطبيعه خلابه لم أرى مثلها في حياتي على الرغم اني سافرت أماكن كثيره
لكن طرقها الوعره الي تسبب الغثيان وفنادقها المتوسطه والاقل من المتوسطه تخليني ما أنصح فيها لناس يحبون كل شي كامل
مقابل الي يدفعونه على الاقل .. لان ما ينقال عنها رخيصه جدا .. او يمكن لانه انلعب علينا ما نشوفها رخيصه جدا
يعني تكاليف سفرنا لها بدون التذاكر مشابهه لتايلند أو اندونيسيا على الرغم ان الاخيرتين نحظى فيها بفنادق فعلا 5 نجوم
أنا افكر في الناس الي توفقوا مع مكاتب كويسه هل هم ما اكتشفو انهم انلعب عليهم أما ما اكتشفو انهم انلعب عليهم ؟ خخ
لان فعلا هذي المكاتب تلعب بيدها ورجلها .. تعالو نحسب تكاليف الفنادق فقط من الانترنت حسب موقع واحد في الانترنت
نجي لبنتوته لو 4 ليالي 5 أيام يعني في أفضل غرفه في الفندق وهي ديلوكس سويت مع الافطار 125$ يعني 500$ ل 4 أيام
في ايريل ريجنسي أنا حصلته ب 114$ مع الافطار والعشاء يعني ليلتين 228$ وفي سينامن قراند خلونا نقول 225$ المجموع
كل الفنادق 953 خن نقول 960$ ل 8 ليالي .. والسواق يمكن 20 الى 25$ يوميته .. يعني 140$ ل ايام لانه مافيه مشاوير في بنتوته
يوميا ..
و100$ هذي للمكتب .. انلعب علينا بحدود 250$ .. الله ياخذهم ..
ما كملت آخر مقلب صادف الكثير بدون ما يدرون .. الا وهو ان أول يوم في سينامن قراند عطانا من الغرف الجديده
ديلوكس روم .. وآخر يوم عطانا ستاندر وهي من الغرف البعيده نوعا ما عن اللوبي وسبق ووضع صورتها بعض الاعضاء هنا
انا ماعندي صورة الغرفه الثانيه بس عندي الأولى وشوفو انتم الفرق بين الغرفتين وطبعا لما كلمناه باجحنا وقال مافيه غرف متوفره .. قلنا طيب رجعلنا الفرق قال ماعنديلكم شي ..
الفندق عموما رائع الا غرفتنا .. المطعم رهيب والبوفيه كبير جدا ومتنوع يشرف عليه كبار الطباخين في سيرلانكا
ومتعوب عليه مو أي كلام مثل بوفية ايريل ريجنسي ... أو بوفيه تاج .. الي يوميا الفطور نفس ماهو ما يغيريون شي
ومن ثالث يوم لنا دلينا كل طبق وين مكانه .. يعني بوفيه سينامن 10/10 .. من ناحية التنوع والطعم ومراعاة كل الاصناف في اكل حار ومو حار فيه سيرلانكي وهندي وبحري وايطالي وياباني .. وهالاصناف أساسيه حتى لو كان يوم مخصص لدولة معينه .. أما بوفيه ايريل ريجنسي 4/10 .. أما تاج 5/10
عموما خلاص تعبت .. السواق يبي يبدا بزنس خاص فيه والله حق انه جيد وواقف معنا ضد ايكا النصاب ويقول
جربوني واذا قالك احد اني ماني قد كلمتي لاعاد تعلنون عني انا ناوي اعدل اغلاط الرجل السيء ايكا
لانه هو لعوب وماهو قد كلمته وماهو رجال .. وقولو في الانترنت ان اي شي يبونه يكتبونه في العقد عشان يمديهم يفاصلون ويتجادلون لا يتفاهمون بأي شي شفهيا .. بكذا ينحفظ حق الطرفين ..
عموما ابحط رقمه في الرد الاخر باذن الله وبحط بعض الصور للفنادق الي ابيها والي ماعطانا اياها لكن ابعدين لان الحين تونا راجعين من المطار فمان الله
مبروك انته معنا