المغرب المسافرون العرب
أكتشف العالم بين يديك
المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة.
artravelers.com ..
المغرب
وصلنا إلي مطار ابوظبي قادمين من جاكرتا... على العشاء... الشباب إلي معي راح يواصلون للرياض أما أنا كانت لي نوايا ثانيه...ودعتهم في المطار وأخذت عفشي واقرب تاكسي ... بعد اللف والدوران لقيت شقق فندقيه خمس نجوم ... شقق المنزل ... في شارع أكرا... متعوب عليها... أخذت شقه وحطيت العفش .. وصليت المغرب والعشاء وريحت شوي...
في هذه الشقه قضيت أيامي فيها وحيدا مجهزا لأمور السفر
الساعه اللحين صارت عشر في الليل .. طلعت وأخذت تاكسي وقلت اقرب مكتب خطوط.. وداني أبو الشباب لشارع كله مكاتب بس للأسف قفلت... ورجعت بعدها على الشقه.. ونومه ...
الصبح واخوكم زي الحصان.. واحلى دش واحلى فطور... وعلى مكاتب الطيران... أول مكتب ..
النيه للسفر موجوده ... بس وين ؟؟؟ كنت متردد بين تركيا والمغرب... مسافر مسافر الله لايعوق بشر... بس كانت تعتمد على الحجز واقرب وقت.. طيب المكتب اللي بعده....
التذكره ب 4200 درهم.... والرحله باكر الساعه ثلاثه العصر... قصيت التذكره ومشيت للشقه..
الوقت ممل... وخصوصا اني وحيد..مادري وين أروح... قضيت الوقت مابين بتزاهت وسبلاش والشقه..وفي الليل كانت مباراة تركيا والمانيا في يورو 2008...:8888:
في اليوم الثاني صحيت الصبح ... جهزت أموري وعلى الساعة 12 الظهر سويت تشك آوت وطلعت للمطار..
الي مطار ابوظبي الدولي
قصيت البوردينق وشحنت الشنطه وجلست في الانتظار... كنت متوتر ومتنرفز والله يلوم اللي يلومني .. يعني أول مره أسافرلحالي ولبلد أول مره أزوره .. وفوق هذا كله الناس متخوفه من المغرب زي ما انتم عارفين واللي زاد التوتر اتصال خوي علي وقام يتكلم علي : أنت مجنون تروح لحالك... انتبه لايسحرونك وخلك حريص ومن هالكلام .. وأزيدكم من الشعر بيت ..في الطياره كان قدامي اثنين شيبان ...مايعرفون بعض.. المهم خشوا في بعض وانا اتسمع..قال واحد انا من عام 88 وانا سنويا أروح للمغرب..قلت هذا منتهي...قال الثاني انا إذا مارحت للمغرب أربع مرات في السنه وإلا اعتبر نفسي ماسافرت قلت هذا قاضي:112: ...يعني من كلامهم زادوني توتر... قلت الله يستر لا انهبل زيهم وكل شوي ساحب الشنطه وعلى المغرب:bounce8:... وش فيه البلد هذا.. المهم كنت على أعصابي ... رحت وصرفت الفين وخمسمية درهم أماراتي إلي مغربي.. وهجوله حتى أعلنوا عن الرحله وركبنا الطياره واقلعت...
وبدء النزول التدريجي وسط عاصفه من التصفيق
وصلنا مطار محمد الخامس بعد رحله طويله.. قرابة ثمان ساعات... المهم نزلت المطار.. كنت آخر واحد في طابور الصف اللي انا واقف فيه.. استقبلني موظف الجوازات بوجه عابس ..
أول مره تجي المغرب ..
ايه نعم...
رجع الجواز وقال أكرمنا حتى نضبطك... حطيت في الجواز خمسين درهم ورجعته له... شافها ورجع الجواز مره ثانيه.. قالي كلام مافهمته بس كان واضح انه ماهو راضي عن المبلغ.. شين وقوي عين.. قلت له ماعندي غيرها تبيها وألا أخذها .. سكت وختم وبلع العافيه( عافية السعودية مش المغرب ) وأخذها.. اللي هذا أوله ينعاف تاليه.. طلعت من عند الجوازات وجلست عند بوابة الخروج وطلبت اتاي..كنت تايه ما ادري وين أروح.. ادرعم مع اللي يدرعمون مادري وين الوجه.. السواقين كل واحد يعرض خدماته... ماكنت ابي أبين لهم اني ما اعرف شيء... المهم شفت صاحب تاكسي وجهه سمح.. مسكته على جنب وقلت شوف لي فندق كويس وفي مكان محترم... قال فيه فندق اتلنتيس اغلب الخليجيين يسكنونه.. قلت توكلنا.. وصلنا الفندق وألا وهو عامر زي مايقولون... رحت لفندق السويس اللي جنبه.. ولقيت غرفه ب 700 درهم مع الفطور... حجزت وريحت شوي.. مافيني شده للفرفره والدوران….
الخروج من المطار
وصلنا كازا بعد نصف ساعه تقريبا
صور للفندق وانصح بعدم السكن فيه
طلعت أشوف واستكشف المكان... الشاطئ قريب.. تعشيت في احد هالمطاعم ... رجعت ونمت بعد تعب ....
مازال للحديث بقيه