كوالالمبور المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
اللزاز
12-08-2022 - 08:29 am
  1. بسم الله الرحمن الرحيم

  2. بعد التحيه والسلام............... معاكم اخوكم اللزاز وحرمه

  3. كانت رحلتى مع بدايه الاجازه الصيفيه1425 اسف على التاخير


بسم الله الرحمن الرحيم

بعد التحيه والسلام............... معاكم اخوكم اللزاز وحرمه

اولا كل عام وانتم بخير وبصحه وسلامه احبابى مشتركى وقراء هذا المنتدى الرائع " حبيت اشارككم رحلتى ومغامراتى فى ماليزيا الساحره اللتى جاء اختيارى لقضاء شهر العسل فيها بعد عده مفاضلات من الدول الاخرى وفى الاخير رسيت على ماليزيا والحمد لله كان الاختيار موفق (وهنا احب ان ابين فضل هذا المنتدى ) بعد الله على قبل السفر الذى افادنى بشكل كبير جداجدا والشكر الجزيل موصول للقائمين عليه والمشتركين فيه فجزاكم الله خير

كانت رحلتى مع بدايه الاجازه الصيفيه1425 اسف على التاخير

فى البدايه خليت حجزى بعد الزواج ب5 ايام (الركاده زينه) وكان الحجزعلى.........خط البلده....عفوااقصد الاماراتيه اللى توبه ما عاد اسافر معاها ولا انصح بالسفر عليها( والله ما هو تحيز) وراح تعرفون السبب من القصه
خطه الرحله كانت ثلاث ليالى فى كولا لمبور(اول ليلتين فى الخيول الذهبيه والثالثه فى مندرين)وبعدها ثلاث ليالى فى بينانق فى فندق بارك رويال وبعدها ثلاث ليالى فى لنكاوى فى فندق لانكاوى لاقون وبعدها ليلتين فى بينانق فى فندق شينقريلا راساساينق وبعدها كوالالمبور خمس ليالى **طبعا داخل البرنامج جنتنق+كاميرون هاى لاند+افاموزا وهذى كلها بدون مبيت .
بعد ان اخترت البرنامج من فنادق وخلافه ارسلت ايميل على مكتب سفريات فى ماليزيا كنت اخذت اسمه ورقمه من هذا المنتدى بدون ذكر اسماء المهم اتفقت معاهم بعد عده ايميلات ومكالمات دوليه وارسلت لهم نسبه من المبلغ(وهذى من اكبر غلطاتى وراح تعرفون ليش بعدين)
المهم وصلنا مطار دبى حدود المغرب لان رحلتنا ترانزيت من دبى والاقلاع الساعه 3 الفجر فكان امامنا وقت طويل فى المطار من المغرب لحد الفجر(فرينا وجلسنا وتمشينا وتعشيناورحنا وجينا ماجات الساعه3 الا بعد ما انتهينا من التعب المهم ركبنا الطياره اللى كانت زحمه مره (خليجيين وبنقلاديشيين) لان الطياره توقف ترانزيت فى دكا وتجلس ساعتين اتنزل ركاب واتركب غيرهم من بنقلادش وبعدها وصلنا مطار كوالالمبور الجميل بس للاسف ما استمتعت بمشاهدته زين من شده التعب والارهاق وقله النوم والترانزيتات(الله لا يعودها) انصح الاخوه بالسفر دايركت بعدها اخذنا تاكسى للفندق اللى حاجزين فيه وهو الخيول الذهبيه اللى كان منظره من الخارج رائع ومن الداخل اقصد الغرف لك عليها
وبعد ما اخذنا الغرفه طبعا مواصلين نمنا لاشعوريا لحد العاشره مساءا...وبعد ما صحصحنا نزلنا نبى نروح لمجمع التجارى اللى جنب الفندق(الماينز) نتمشى ونتعشى هناك اذا ما خانتنى الذاكره هذا اسمه المهم قالولنا شطبنا يا فندم يعنى كل حاجه سكرت لا مركب ولا حاجه يعنى ما عندك الا هالفندق ورحت سالت الرسبشين بعد قالولى حتى لو خذت تكسى ماراح توصل لوسط البلد(شارع العرب) الابعد نص ساعه ماراح يكون فاتح الا الديسكوات صراحه انصدمت (((بعدين درينا ان ما عندهم سالفه.....بس وشهو عقبه ))) وخليناها تمشيه فى الفندق وحولين البحيره وكان المكان رائع فى المساء ورومانسى وهادى وهو من اهدى الفنادق اللى سكنت فيها..وتقييمى للفندق جيد جدا ما عدا التاثيث يعنى يبيله اعاده فرش من جديد وبعدها رجعنا للغرفه :thumb_ico وبكذا انتهت الليله الاولى
يتبع ان شاء الله


التعليقات (9)
طيف الورود
طيف الورود
تقرير رائع والفنادق اللي اخترتها جدا رائعة ماشاء الله (وحلات الخيول الذهبية هدوءة) اما عن البلد انة قافل ماعدا الديسكو ماهم صادقين لانها تفتح الى الساعة 12 وعلى حسب كل مطعم عن غيرة.....
بانتظار باقي الرحلة ان شاء الله............

KABAYAN
KABAYAN
بداية رائعه للتقرير وياليت تطوله شوي
وحنا في انتظار المزيد وبارك الله فيك أخوي

القنيط
القنيط
بدايه ممتازه لتقريرك اخ اللزاز..
بس حبيت اسالك عن غرف الخيول الذهبيه وش الي مااعجبك..يعني الغرف صغيره او الأثاث قديم؟؟ وضح العيوب لو تكرت
حياك الله

لموية العسولة
لموية العسولة
الله يعطيك العافية وبانتظار المزيد
تحياتي

المراسم الملكية 1
المراسم الملكية 1
موضوع شيق وبانتظار التكمله

فهد
فهد
السلام عليكم ورحمة الله وبركاته
أولاً : حياك الله .... وألف مبروك الزواج ..
ثانيًا : الحمد لله على السلامة .. ورحلة بأذن الله سعيدة وموفقة ..
ثالثًا :الله يعطيك العافية على التقرير ... وأستمر بارك الله فيك أخي الكريم ..
فهد©

اللزاز
اللزاز
  1. اليوم الثانى:

  2. اليوم الثالث:


عدنا والعود احمد.............اشكر جميع الاخوان على تفاعلهم معانا وان شاء الله راح تعجبكم بقيه الرحله والمغامره (صايرين عدنان ولينا)

اليوم الثانى:

قمنا من الصباح الباكر ونزلنا لتناول بوفيه الافطار فى الفندق وبعدها خذنا جوله للتعرف على الفندق من الخارج فى النهار والاستمتاع بالمناظر الجميله المحيطه بالفندق وبعد اللتمتع بالمناظر قررنا ركوب المركب الصغير اللى من بحيره الفندق الى المجمع التجارى القريب منه (على ما اعتقد الماينز) وقبل ما اكلمكم عن المجمع احب اتكلم عن المركب لان فيه مركب من البحيره للمجمع وفيه باص بس افضل انك تروح بالمركب صراحه شى عجيب من مناظر ومياه وخضره وهواء عليل يعنى متعه ولابعدها المهم وصلنا المجمع التجارى فى لحظات لانه قريب من الفندق وصرفنا دولارات عندهم وصرفهم لك عليه بس فرق بسيط جدا(اللى فى المجمعات عند شارع العرب افضل) ..بعد الصرافه رحنا نتمشى ونتعرف على المجمع من الى واعجبتنى فكره المراكب اللى تدخل فى وسط المجمع فكره غريبه وحلوه(((سمعت انهم بيسوونها فى مجمع البطحا)) ...تعرفون كان المجمع فاضى وحنا امصبحينهم من بدرى فاخذنا راحتنا فى التمشى والتسوق وبعد اكثر من ساعه زهقنا ورجعنا للفندق عن طريق الباص للتعرف على المناظر من الجهه الاخرى بس طبعا المركب احلى المهم رجعنا الفندق وغيرنا الملابس للاستعداد للذهاب لمدينه الالعاب صن واى لاقون كما كان مخطط له من قبل لانى وانا فى السعوديه كنت كاتب على اوراق جدولنا اليومى يعنى وين انروح من الصباح الى المساء..... المهم بعد ماغيرنا ملابسنا اخذنا تاكسى من امام الفندق واتجهنا لمدينه الالعاب اخذنا التذاكر وعلقنا الشرايط على ايدينا ودخلنا وابتدينا نتعرف عليها ونلعب ببعض العابها وركبنا الجسر المعلق الاكثر من رائع وذهبنا للجهه الاخرى من عليه ولما جينا نبى نرجع رفضت المدام من الخوف وكثر ما حاولت اقنعها الا ان كل محاولاتى باءت بالفشل فاضطرينا انه نرجع مشى للجهه الاولى لان فى الجهه هذى مافيه شى وعلى فكره عند صعودنا للجسر من البدايه تاخرنا شوى لانه كان فيه تصوير فلم هندى على الجسر فاذا شفتونى فى الفلم راح تعرفونى وبعد التمشيه والتمتع ببعض الالعاب لان ماهو كلها يصلح لنا قررنا الخروج لان بدت المناظر السيئه تظهر من الصينيين وملابسهم اللى زى وجيهم حتى انه احنا ما قدرنا نروح من ناحيه المياه ابدا من المناظر السيئه(لابسين من غير هدوم) الله يثبتنا امين.... فخرجنا للمجمع اللى جنب المدينه وكان كبير جميل وفيه كل شى تقريبا من مطاعم ومحلات تجاريه وماركات..فتغدينا فيه وتمشينا فى السوق(معاك المدام يعنى لازم تقعد شوى) وبعد ما خلصنا من السوق وبدا التعب يبين فينا قررنا الرجوع للفندق ولما خرجنا للشارع اعجبنى جدا التصميم الخارجى للمجمع ومجسم الاسد الضخم على البوابه....اخذنا تاكسى ورجعنا للفندق قبل المغيب بقليل وكنا مخططين للذهاب للحديقه اللى جنب مجمع الماينز وقالوا لنا سكرت اوقريب اتسكر لانها الساعه 6 اتسكر فزعلنا بس مهو كثير لانى سمعت منهم انها للاطفال اكثر يعنى اذا كان معاك اطفال راح تستمتعون فيها من متعه ووناسه اطفالك..فرجعنا لغرفتنا وريحنا شوى فيها ونزلنا بالليل للتمشى حولين الفندق((تعرفون جو رومانسى وحنا معاريس جدد...حركات) بعدها تعشينا ورجعنا للغرفه :thumb_ico وبكذا انتهت الليله الثانيه

اليوم الثالث:

قمنا من الصباح الباكر ونزلنا لتناول الافطار فى بوفيه الفندق وبعد ان انتهينا ذهبنا للغرفه لتجهيز الشنط لاننا مغادرين الخيول الذهبيه الى فندق مندرين الرائع
وبعد ما سوينا شك اوت(ملاحظه كنا نقدر نجلس الى حد الثانيه تقريبا بس المخطط يجبرنا انه احنا نغادر الفندق بدرى)..وبعدها اخذنا تاكسى للمندرين وكان الاستقبال رائع منهم من عند الباب تاخذك الموظفه لحد الرسيبشن وهى اللى تعملك الحجز حقك....وبما ان الفندق مليان للاخر واحنا جينا بدرى طلبوا منا الانتظار لحد ما يرتبون لنا غرفه لانه الحجز مفروض انه بعد 12 الظهر واحنا قلنا مافيه مشكله صديق احنا نبى نطلع نتمشى وانتو خلوا الشنط فى الامانات واطلبوا لنا تاكسى يودينا جنتنق وقالوا الساعه المباركه انت استرح فى اللوبى لحد ما يجى التاكسى..وبعد ما جاء شاهينا الا قالوا التاكسى وصل شربنا الشاهى على السريع وركبنا التاكسى(كان افشل تاكسى فى التاريخ وصاحبه اعفن واحد على مر التاريخ) كان السواق شايب وعصبى وفيه ريحه خايسه وسواقته اتجيب المرض طول الطريق مسرع ويلف بقوه حتى انك تضرب الدريشه من قوه اللفه (شوماخر صينى) ولا يبى يشرح لك اى حاجه واصلا هو مايعرف يتكلم الا صينى واذا كلمته عصب الغبى المهم كان الطريق جميل بس ما خلانا نستمتع فيه ابو الشباب وقهرنى زياده لما وصلنا لان الذكى ما وقفنا عند التلفريك اهو بسيارته الخايسه صعد فينا الجبل لحد ما وصلنا لمدينه الالعاب لما شفت المدينه فى وجهى ودريت انه ما وقف عند التلفريك انقهرت وبغيت اصقه على عينه من القهر المهم تعوذت من الشيطان ونزلنا عند مدينه الالعاب وكانت على وشك انها تفتح وما مر دقايق بسيطه الا وفتحوها ودخلنا احنا والناس اللى كانوا قبلنا فى المكان وكان الجو شى فوق الوصف والخيال يعنى رهيب وغيوم وضباب ورذاذ مطر شى رائع وعلى فكره الشباب فى المنتدى يوصون بالملابس الثقيله لدرجه انى بغيت اخذ الفروه معى بس اشوى انى هونت ولا اخذتها... على العموم الجو لطيف لطيف ورائع وفيه بروده الشى البسيط يعنى الكبار ما عليهم خلاف اذا معاك اصغار يعنى لبسهم بس مهو واجد
حبايبى اللى يجى لهالمكان ويضن انها مدينه العاب كبيره والعابها حديثه غلطان المدينه عاديه جدا كمدينه العاب والصاله المغلقه ترتيبها وديكوراتها افضل من اللى فى الساحه الخارجيه ....على العموم الروحه لجنتنق ممتعه والجو شى خيال يعنى يكفيها نص يوم من الصباح الى العصر
وبعد ما فرينا المكان كله واستمتعنا فيه طلعنا واخذا تاكسى (بدون تلفريك للمره الثانيه) هذى عاد غلطتى بس كنا مستعجلين نبى نروح نقص تذاكر ليوم غد لبينانق على الباص ..المهم ركبنا مع التاكسى (على فكره اى واحد يجى لجنتنق لا يخلى السواق ينتظره بره راح يحسب عليه فلوس على الفاضى تقريبا 300 احسن حاجه انك تاخذ اى تاكسى من الشارع ويوصلك لجنتنق بتقريبا 70 رينقت والرجعه فيه الف تاكسى بره مايبون يرجعون فاضيين وراح يوصلونك حتى ب 60 رينقت.
وبعد ما ركبت مع التاكسى قلتله يودينى محطه باصات بودرايا علشان نحجز لبينانق لسفره بكره المهم وصلنا متاخرين على شركه نايس اللى يقولون فى ماليزيا انها الافضل للنقل فى الباصات وقالوا لنا ما فيه تذاكر فذهبنا لمحطه بودرايا واشتريت تذكرتين ب50 رينقت بس ما كنت مقتنع فى نوعيه الباص اللى بركبه بكره مع انى ما شفته (شى داخلى يقولى ما هو زين مدرى ليش لحد الان) المهم حجزنا على بكره الساعه 2 وبعدها رحنا للفندق اللى هو مندرين واستلمنا غرفتنا الرائعه والجميله من اثاث ونظافه وديكورات وموقعها المميز (غرفتنا على شارعين) المطل على البرجين التؤم والحديقه الخلفيه وفيها شنطنا وهديه لنا (عرايس) عباره عن ورد وشوكليت
وخلال اليومين الى راحوا كان فيه اتصالات بينى وبين صاحب مكتب السفريات اللى فى ما ليزيا اللى كان حجزى عن طريقهم.. فكلمته واتفقت معاه انه يجينى فى الفندق ويعطينى الفاوتشرات الباقيه واعطيه باقى المبلغ مع انى كنت زعلان منهم وانا فى السعوديه لا نهم وبعد ما اتفقت معاهم على المبلغ المطلوب وارسلتلهم دفعه من المبغ ارسلولى ايميل وقالولى والله حصل خطا فى سعر احد الفنادق والسعر الصحيح اعلى من كذا وراح يزيد المبلغ عليك.... المهم انا زعلت بس ما فى اليد حيله قلت لاشفته انتفاهم (شغل نصب يخلونك امام الامر الواقع) ولما جانى تكلمت معاه فى الموضوع وصار يتاسف وهذى البنت غلطت الزبده عطيته الفلوس وقلت ما ابى اخرب سفرتى عى سخافات واكدر مزاجى وتحملت الفرق واخذت الحجوزات(الفاوتشرات) ومن ذكائى ما دققت على ااوراق الحجوزات على ان الشغله ثقه(راح تعرفون بعدين ايش اللى حصل)
وبعد ما ريحنا فى الغرفه شوى خرجنا بره الفندق وذهبنا لمجمع سوريا الملاصق للتوين تاورز وكان المجمع فخم جدا وكله ماركات وغالى وبعد ما خلصنا منه خرجنا واخذنا تاكسى من الشارع وذهبنا للسوق الصينى وتمشينا فيه وتسوقنا منه وكان السياح قليلين من عرب وغيرهم لانى سفرتى اول الاجازه على طول فكان المكان شبه فاضى وكل الصينين ينادونك ويبونك تشترى منهم لانك انت الزبون الوحيد تقريبا معنه اخلاقهم تعيسه جدا ولا وضحت الا لما كثروا الناس (ولنا حديث انا شاء الله عنهم بعدين)
وبعدها رجعنا للفندق وتعشينا فيه ورجعنا لغرفتنا :thumb_ico وبكذا انتهت الليله الثالثه

المراسم الملكية 1
المراسم الملكية 1
السلام عليكم ورحمة الله وبركاته
وشهو الأحسن فندق مندرين ولا ماريوت اللي في شارع العرب

الشعيبي
الشعيبي
السلام عليكم ...
الف الف مبروك اخونا اللزاز وعقبالنا والعزوبية
الحمدلله على سلامتكم والحمدلله انه ارض الملايو عجبتكم
مشكورين ياغالي على تقريرك الجميل .. والصيني راعي التاكسي
طلع مصيبة وفراخة


خصم يصل إلى 25%