تايلاند المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
معجب
17-11-2022 - 06:39 am
بدأت رحلتنا بعد يوم واحد فقط من اخر اختبار نهائي وبالتحديد يوم 27 يناير ومن بدايتها كانت نكبة مالقينا احد يوصلنا لمطار البحرين,حيث انا ساكنين بالدمام والله ويعجبك ابو راجح ويوصينا نروح الى سواقين التاكسي في محطة النقل (يعجبك من ناحية الفكرة بس ماعطانا حق الروحة) 120 ريال كاش
والله ونظهر من البيت انا ويا زميلي كاشخين وريحة العطر فايحة ويوصلنا السواق (الهندي الغبي اللي دايم يضيع الطريق لدرجة ان زميلي مرة وصاه يجي البيت في غرب الدمام الغبي راح توي تاون في الكورنيش شرق الدمام . لا ويقولون ضيع بعد ماحطنا في محطة النقل ورجع متاخر للبيت)
الحمدلله ذاك اليوم مافي زحمة على الجسر تعرفون وقت اختبارات ويوم اثنين , وصلنا لمطار البحرين وانتظرنا حوالي ساعتين لطائرتنا اللي بتروح لبانكوك عن طريق دبي (طبعا وقتها لا اهلي ولا اهل زميلي يدرون ان حنا بنسافر لتايلاند بس لو دروا كان قاموا علينا تكفيخ)
طبعا سافرنا على اساس حضورنا لمهرجان دبي(18 يوم في مهرجان دبي!!!!!!) وصلنا لمطار دبي الانيق وماردنا والله الا مطعم سفر , ودقينا في ذاك البوفيه اللي يحبه قلبك وانتظرنا حوالي 5 ساعات وكنها 5 دقايق لطايرتنا اللي بتقلع لبانكوك طبعا تمشينا في السوق الحرة وريحنا شوي في كافي القرية الايرلندية
ونادت القاعة حان وقت مغادرة الرحلة رقم 382 والمتجهة الى بانكوك يرجى من جميع المسافرين التوجه الى البوابة رقم 21 .
وغادرت الطايرة 5 ساعات ونص الا حنا في مطار بانكوك ونصلي اللي فاتنا من صلوات وننصى(نتجه) الى كاونتر بانكوك ايرويز او طيران بانكوك ونقص تذكرة على اقرب رحلة لجزيرة فوكيت ساعة ونص الا حنا في بانكوك ايرويز اللي طيرانهم جدا نظيف وجديد بالحيل وخذت رحلتنا من بانكوك الى فوكيت ساعة وعشر ووصلنا بحول الله الى جزيرة الاحلام جزيرة فوكيت او لؤلؤة بحر اندامان
ولاحظوا من صارت حادثة محطة النقل بالدمام الى وصولنا الى فوكيت قسم بالله ماطب النوم عيني تقريبا 36 ساعة بس والله حللت النوم في فوكيت
انتهى الجزء الاول


التعليقات (9)
معجب
معجب
بعد وصولنا لمطار فوكيت خذينا عفشنا وسالنا عن التاكسي ونختار هذيك الكامري البيضاء اللي تلق (تلمع) وتودينا لمنتجع ماريوت الفاخر حيث استقبلونا بطوق الياسمين وعصير عشبة المنثول الباردة وفوطة معطرة حارة , وحقيقة المنتجع كبير وجميل جدا لدرجة ان ماودك تطلع منه ابد
امسينا اول ليلة ومن بكرة ذهبنا الى اشهر شواطئ فوكيت اللي هو شاطئ باتونجpatong حيث السياح (متسدحين) على الشاطئ وتقدر تشاهد جميع انواع الرياضات البحرية ومقابل الشاطئ تلقى المطاعم والمقاهي والمحلات اللي ماتقفل الا الواحدة صباحا تمشينا شوي وتغدينا في مطعم اكلات بحرية seafoodبس توهقنا بالسمكة كبيرة بس طعمها الله يديم النعمة
طبعا وقتها كنا منشغلين لازم نكلم الاهل والله واكلم الوالدة وتنشدني عن مهرجان دبي واقولها المهرجان زين , مادرت اني في فوكيت.
عقب ما ارتحنا وكلمنا الاهل قلت لازم نبدا الهبال والله واسال عن اكبر فيل في الجزيرة ويودينا راعي التك توك (دباب مغطى بثلاث كفرات) الى سيام سفاري اللي فيها يرقى بك الفيل الى قمة جبل تشوف البحر تحت وانت وسط الغابة فوق .
والله ونركب الفيل ويوصيه مدربه التايلندي مرة يقربنا يم حافة الجبل ومرة يوقف بنا واخرها يقطع بنا الشارع ويسرع فينا (ويومنا في القرية التايلندية هبلت به كل ما مد خرطومه بياكل الموز اللي في يدي واسحب يدي, حقد علي وانتفض بجسمه واقمز من الخوف و رفيقي يضحك)
بعدها رحنا لنادي الرماية ونطلب ذاك الشوزن ويقوم التحدي بيني وبين رفيقي واصقع كل الطلقات في الدايرة السوداء اما هو بغى يشيل راس المدربة التايلندية(لا امزح كلنا قالت لنا المدربةvery good وكبرت رووسنا )
اليوم الثاني رحنا لمدينة فوكيتphuket town وذهبنا الى القرية التايلندية وصار ماصار يوم اهبل بالفيل وشفنا الملاكمة التايلندية وانبسطنا, بعدين رحنا لسباق سيارات الكارت وحدينا واحد شكله بريطاني وعديناه وكسرنا راسه في السباق (يعني فزنا عليه);)
اخر شي طلعنا لاعلى هضبة في المدينةlang veiw وتشوفون منظر المدينة من على قمة هضبة هذي مشابهة لقطار الجبل في بينانج بس حنا ركبنا سيارة لان مافي قطار في فوكيت
بعدين رحنا لسوق روبنسون تقضينا ورجعنا للمنتجع
انتهى الجزء الثاني

معجب
معجب
اليوم الثالث نصه قضيناه في المنتجع حيث قمنا مبكر يمكن الساعة 7 وطلبنا الفطور وتقهوينا الشاهي في البلكونة المطلة على الحديقة والبحيرة وعينا من الله خير , ثم زهمنا (كلمنا بالتلفون)على النادي الصحي نشوف وش عندهم قال عقب عشر دقايق ستبدأالتمارين المائية الايقاعية water aerobicsفي البركة الشمالية قلت: توكل على الله , قال: انتو اثنين , قلت : الله الله.
خذينا الفوط ومغطنا (ذهبنا بسرعة)للبركة ولاننا في الصبح ماجا من المنتجع الا حنا للتمارين ويبدأ المدرب التايلندي ويشغل المسجل ونسوي التمارين مثله من شافنا قال مهابيل وفي احد التمارين رفيقي يمسك يمناي والمدرب يمسك يدي اليسار ويخلينا ندور, سوينا التمرين لرفيقي ثم قلت له باسوي انا ويا خويي ذا التمرين لك واكلم رفيقي بالعربي عشان مايفهم واتفقنا نعد لثلاثة ثم نغرقه وفعلا غرقناه وماصاد خير , من بكره شفناه يعاطس.
بعد احداث البركة على طول اتجهنا للنادي الصحي حيث الساونا والجاكوزي وطولنا فيه وزانت السوالف على مخ مدربنا التايلندي ماطلعنا الا يوم اقبل الامريكي وقلنا بلاش امراض وفعلا (نفذنا بجلودنا ) يعني هربنا من الساونا بعدها خذينا جيم تنس ريشة لين ماحسينا بالجوع رحنا المطعم البحري في المنتجع ويوم جاب الفاتورة قلت على الحساب ( وعدك اذا بتسوي chek out) بعدها رحنا لشاطئ باتونجpatong beach
ثم ذهبنا لمنطقة باني كاب اللي فيها اجمل منطقة غروب في العالم وفعلا انصدمنا بعد ماشفنا زحمة السياح خصوصا من الاجانب والمنظر فعلا كان رائع , بعدها رحنا لمكتب سياحي في كارون بيتش علشان نحجز مقعدين لعرض فوكيت فانتاسي اللي تعتبر افضل مكان سياحي ترفيهي ليلي حسب تصنيف هيئة السياحة التايلندية , وصلنا فوكيت فانتاسي الساعة 8 المساء تمشينا في المحلات والالعاب وشفنا العروض البهلوانية المصاحبة لانغام الموسيقى التايلندية في الساعة 9 ونص اعلنوا عن العرض ورحنا وانصدمنا بالزحمة الكبيرة عند المسرح الخاص وقبل ماندخله اخذوا كل ادوات التصوير ودخلنا المسرح اللي كان ممتلئ عن بكرة ابيه (4000 كرسي) وتواصل العرض ساعة ونص وفعلا كان العرض خيالي ويعتمد على عامل الابهار من ناحية المؤثرات الصوتية و مشاركة الافيال والطيور و استعراض الممثلين في الهواء وكان هذا العرض يحكي عن قصة فوكيت
وبعد ماطلعنا خذينا الكاميرات وصورنا مع الممثلين ثم رجعنا للمنتجع وحطينا رووسنا(يعني رقدنا)
اليوم الرابع والاخير قضيناه كله في المنتجع حيث بدينا بالسباحة ثم النادي الصحي ثم الجولة بين الحدائق الى ما استوقفنا نادي الاطفال هو فعلا للاطفال لكنه يحتوي على بلياردو وتنس طاولة وانترنت وشاشة كبيرة لعرض الافلام وتقابلنا مع الاطفال الكوريين وهم جو و شي اوو و الولد المتين(سميناه البطريق) واصغرهم واحد دب خش عرض مع رفيقي وصاروا اصدقاء
المهم تعشينا في كوتشينا المطعم الايطالي (ايضا الفاتورة على الحساب)
من بكرة صكونا ب 150 دولار وارتحت لاني توقعتها اكثر
وناخذ تاكسي لمطار فوكيت عشان الاقلاع الى بانكوك الساعة 1 وربع
انتهى الجزء الثالث

معجب
معجب
وصلنا الى مطار بانكوك(العادي جدا لكنه افضل من مطار جدة;)) اخذنا تاكسي الى فندق لاندمارك التابع لمجموعة(summit) العالمية طبعا اللي نصحني اخذ الفندق هي الاخت قطرية العضو في منتدى الرحال العربي واقدم شكري لها على الفندق الرائع لان فعلا الغرف كانت حلوة صحيح اللوبي لم يرتق الى مستوى الغرف لكنني ارتحت لنظافة الفندق خاصة عندما قارنته بفنادق اخرى كفندق جريس(grace) الموبوء مع احترامي لكل من اشاد بفندق جريس.
ولكن لااخفيكم باننا لم نرتاح في بانكوك لفقرها من الناحية السياحية ولتلوث جوها و انعدام النظافة فيها والحمد لله ان اقامتنا لم تزد عن 3 ليالي استغليناها لزيارة الفنادق الفخمة(بينينسولا و ماندرين اورينتال و شنجريلا وبانيان تري وسوخوثاي افضل هذه الفنادق) والمعابد والقصور التايلندية(جراند بالاس والمعابد المجاورة) وحديقة دوسيت زوو
وزرنا قرية سيلوم (silom village) التي تقع في طريق سيلوم ولعبنا البولينج في world trade center وابدي استغرابي لمشاهدة عدة عوائل يزورون بانكوك حيث انها لاتنفع ابدا للعوائل فالاسعار مقاربة لاسعار كوالالمبور بل كوالالمبور تتفوق عليها من ناحية النظافة وجودة المنتج السياحي وتعدد مناطق الترفيه بعكس بانكوك تماما .
ولكن نسينا كل هذا عندما اتصل رفيقي بوالدته للسلام عليها فسالها عن قيام الحرب في العراق فابدت استغرابها لهذا السؤال (لتفكيرها باننا في دبي ومن الطبيعي ان نعرف اخر الاخبار من خلال الصحف والتلفاز) فساورها الشك باننا لسنا في دبي (بالعربي يعني توهق خويي)
واخيرا اتي اخر يوم ولم يبقى على الرحلة الى هونج كونج الا ساعتان وركبنا الطائرة التي كانت ممتلئة خصوصا من الصينيين ومكثنا في الجو ساعتين ووصلنا الى مطار هونج كونج اللي حقيقة زرناه من قبل انا و زميلي (ترانزيت) قبل سنة ونصف , وللعلم فان هذا المطار نال جائزة افضل مطار في العالم العام الماضي متفوقا على مطاري دبي وسنغافورة.
اخذنا تذكرتي نقل بالباص(city flayer) الى فندق اكسيلسيور التابع لمجموعةthe oriental mandrine الفخمة
انتهى الجزء الرابع

معجب
معجب
طبعا ماتصدقون كيف هونج كونج غالية خاصة من ناحية المواصلات , مثلا التاكسي من المطار الى جزيرة هونج كونج 400 ريال والقطار 100 ريال للشخص الواحد ذهابا فقط ولكن city flayer حلت لنا هذه الاشكالية وب 40 ريال فقط للشخص طبعا باصاتهم نظيفة وتحتوي على تلفزيونات وكاميرات مراقبة ولوحات ارشادية ويتكون من دورين يعني دلع:rolleyes:
خذينا الطريق في ساعة الا ربع وكانت الساعة 8 مساءا وفعلا اصابنا الذهول من ازقة بانكوك الكئيبة الى شوارع هونج كونج الحديثة ومن البيوت المتهالكة الى المباني العالية (فرق 180ْدرجة) طبعا من حسن الحظ ان الفندق مطل على خور فيكتوريا(harbour) ومن خلفه منطقة causeway bay اللي تشمل مراكز التسوق والترفيه والناس فيها لغاية منتصف الليل حيث يوجد times square و sogo
طبعا افضل طريقة للمواصلات في هونج كونج قطارات الانفاق subway وبين هونج كونج وكولون ferry او العبارة المائية حيث تكلف فقط ريالين, اما التاكسي فاقل مشوار يكلفك 20 الى 25 ريال, وطبعا هناك الباصات الحديثة بانواعها ماركبناها الا في الطريق للمطار
ومن ناحية المطاعم لاتخاف كل مطاعم الوجبات السريعة فيها وانصحكم بمطعم oliver super sandwich حيث انه منتشر بشكل كبير في هونج كونج وتجد عنده افضل الساندويشات ويضاهي مطاعم سندويشات subway الامريكية
هناك عدة مناطق جميلة في هونج كونج لزيارتها منها برج البيكpeak tower وهو برج يقع على قمة جبل تطل منه على مباني هونج كونج الشاهقة طبعا البرج من تصميم المهندسة العراقية زها حديد ويعتبر مفخرة لشعب هونج كونج
وهناك ايضا مركز المؤتمرات في هونج كونج convetion and exhibition center
الذي يطل على اجمل المرافئ في العالم بعد مرفأ سيدني ويشابه في طريقته دار الاوبرا بسيدني
وهناك فندق بينينسولا الاسطوري الذي يعود بنائه للقرن الماضي وهو على الطراز الفيكتوري ويعتبر من افخم واشهر فنادق هونج كونج وهو بالغ الترف لدرجة ان هيئة سياحة هونج كونج اعتبرت تناول الشاي فيه من ضمن جدولها السياحي
pacific place هو افخم مراكز التسوق في هونج كونج ويحتوي على مجمع تجاري ومباني تجارية وثلاثة فنادق فخمة كونراد وشنجريلا و ماريوت الذي يعتبر اجمل هذه الفنادق
ولا ننسى bank of china ثاني اطول بناية حيث ارتبطت صورته بنشرات السياحة وبالفعل صعدنا الى الطابق 45 في البرج وشاهدنا منظر جميل لهونج كونج و كولون
(لا وجحدنا العسكري اللي كان واقف ورقينا لاخر طابق بس انه بلغه بالجهاز ورجعونا لان اخر طابق كله مكاتب)
اما المشي في شوارع هونج كونج فيعتبر متعة للشخص فهناك lockhart street و henessey road و nathan road الشارع الحيوي في كولون اللي يقع فيه المركز الاسلامي (على فكرة صلينا فيه وسولفنا مع المشرف الباكستاني وتراه يقول نحتاج للدعم وعطانا عنوانه ...الله الله ياشباب )
المهم قضينا اوقات سعيدة في هونج كونج اللي فاقت توقعاتنا وغادرنا بالطائرة ولمدة تسع ساعات الى دانة الدنيا دبي ومهرجانها الضخم (اللي عليه ملاحظات صغيرة هذي السنة بالذات) وبسبب لخبطة الحجوزات اضطرينا الى الاقامة لمدة ليلة واحدة في هوليداي ان down town اللي يتميز بموقعه بين شارعي الرقة والمرقبات
بعدها كملنا اسبوع في شيراتون ديرة الانيق وماقصر معتز موظف الاستقبال وعطانا upgrade للغرفة مطلة على شارع المطينة واخر 4 ليالي جا ابوفاضل وزلق كم زلقة في المدينة المائية wild wadi وضحكنا عليه خاصة في الزحليقة الطويلة بس احسن مافيه انه يحلل البوفيه ;)في مطعم صدف (ماشاء الله) وصادق سواق الفندق الباكستاني (عبدالله) واخذ رقمه علشان يوصلنا بالكابريس الجديدة بسعر مناسب
طبعا من ضمن ملاحظاتي على دبي هذه المرة زيادة الاسعار في المواصلات والخدمات العامة
التاكسي الى شاطئ جميرا يكلف 40 ريال
دورات المياه العامة وضعوا رسوم لدخولها
كثرة رجال التحريات فتعيش وكانك غريب
دخول wild wadi يكلف 100 ريال للشخص
اخيرا وليس اخرا ساقوم بنشر بعض الصور التي التقطتها في رحلتنا في موضوع منفصل
مع بعض مواقع الانترنت المتعلقة باهم الاماكن في رحلتنا
واشكركم جزيل الشكر على قرائتكم لموضوعي المتواضع
تحياتي

Hesham
Hesham
صدقني حبيبي معجب ثاني مره أقراء قصتك .... بس شي غير طبيعي ...
بيني وبينك يبيلها زرقه ولا مانع من زرقت المذكور ... ;)
عافاك الله حبيبي

Moyen Orient
Moyen Orient
حقاً يعطيك العافية يامعجب .. قصصك رائعة ..
ولكن سؤالي يكمن ..
مب تايلند (ممنوعه للأخوه السعوديين) !!!
ولا الواسطات تلعب دور ؟؟؟
وتحياتي لك

معجب
معجب
ya-mas -----> شكرا على اطرائك
بومحمد-------> هي مش واسطة بقدر ماهي مجازفة

Moyen Orient
Moyen Orient
مشكور على التوضيح أخي معجب ..
والله يستر عليك أن شاء الله .. ويسير أمورك أن شاء الله ..
وتحياتي لك ..
اخوك
بومحمد

القلب الكبير
القلب الكبير
ياه ....منك يا معجب ......
والله رحت (وطي) مع هالرحلة المثيرة والجميلة والمضحكة والمفيدة ......
ليتني كنت معكم .......
ننتظر المزيد من الغامرات ......


خصم يصل إلى 25%