1. ميه مساء على أعضاء منتدى العمه.

ميه مساء على أعضاء منتدى العمه.

تعلن الخطوط القاروديه عن قيام رحلتها رقم 00000 والمتجهه بإذن الله إلى جاكرتا فعلى الإخوة المسافرين التوجه إلى بوابة السفر رقم 13 استعداداً لركوب الطائرة(طموح شاب سعودي) ( ايه هين)...... هذا هو الصوت اللي قومني من غفوتي في الاستراحة اللي فوق البوردنق في مطار الملك خالد الدولي بعد ماشربت الكوفي نمت لي شوي تعرفون علشان الواحد يريح شوي (وش ذا المزاج بعد الكوفي تنام؟؟؟؟؟؟) وهكذا ابتدأت أول خطوة لرحلتي الأولى إلى شرق آسيا إلى جاكرتا (والأقر على الله)
(طبعاً تعتبر هذي رحلتي الأولى) يعني بالعربي عليمي وجديد على الديره. الحمد الله الأمور تساهيل ركبنا طيارة الخطوط الأندونيسية (قاروده) وكانت الخدمة ممتازة من ناحية التعامل صح إن الأكل لك عليه شوي (بصراحة يمكن يكون العيب فيني أنا لأني ما تعودت على أكلهم) وريحة الشغلاات اللي في الطيارة تشمها وأنت في طريق الملك فهد تقاطع منفوحة وهذا أسوأ شيء بصراحة.....بس كله يهون لعيون العمه.....وكانت الرحلة تمر بالدمام وانلطعنا شوي في المطار بعدين واصلنا الرحلة......إلى جاكرتا.....مشاهداتي في الطيارة أعجبني أكثر شيء منظر الجزر اللي مدري وشلون جاي شكلها شيء كبير وشيء صغير وشيء مستطيل وشيء مربع وكلها سبحان الله خضار ما ينقطع.
وصلنا المطار بعد رحلة دامت تقريباً 10 ساعات لأنها توقفت في الدمام حوالي ساعتين....وأول ما نزلنا من الطيارة وأتفاجأ بذيك الريحة اللي ماقد شميتها في حياتي مدري هي ريحة الرطوبة وإلا ريحة مطارهم وإلا ريحة دخانهم الزبدة ريحة مميزة ( أشغلتنا أنت وذا الروايح).....ختمنا الجوازات والحمد الله ماكان فيه أي صعوبات.....حتى وصلنا إلى مكتب السفريات اللي اسمه (كاها).....طبعاً نسيت لا اقولكم إني طبعاً مالي أي دخل بالترتيبات كان صاحبي وصديقي ورفيق دربي BIG BOSS متوليها من إلى......فتفاجأت برفيقي قام يرطن مع ذا الأندونيسيين بكلام وشفرات غير معروفة (أعجبتني شفرات) وأنا ماغير فاتح فمي وأطالع BIG BOSS وأطالع ذا الأندونيسية واقول الحمد الله على نعمة الإسلام (وش دخل الإسلام هنا خ) بس ما شاء الله عليه معه لغه مو طبيعية ما أدري من وين جابها وأنواع السواليف مع الموظفة طبعاً لا أنسى إن فيه شباب سعوديين معنا ثانين ما نعرفهم فتحهم أثاميهم يوم سمعوا BIG BOSS يرطن المهم....اتفقنا على شقق اسمها (بتافيا) تقع في جاكرتا في منطقة اسمها (بين هيل) وتعتبر الظاهر أرقى منطقة في جاكرتا (كل العماير اللي جنبها ناطحات سحاب) وتتكون من 34 دور.... الحمد الله وصلنا الشقة وحطينا أغراضنا وعلى الحمام على طول (ترويشة بدش ساخن من النوع اللي يحبه قلبك) وتصبحون على خير (هذي آخر كلمة سمعتها وأنا بغرفتي يقولها لي BIG BOSS بعد ما دخل غرفته) تعرفون رحلة طويلة لازم الواحد يريح شوي........ خ خ خخ نراني نايم خ خ هالحين صحيت....بعد تقريباً 4 ساعات نوم........
المهم بعد ماصحينا توجهنا إلى مجمع اسمه (الأتريم) لغرض تغيير العملة (حسيت إني مثقف على تغيير العملة) المهم صرفنا المقسووم وتوجهنا إلى مطعم اسمه fire steak وتغدينا فيها ذيك الغدوة اللي يحبها قلبك وقفلنا عائدين إلى شقتنا (وشي قفلنا عائدين .....وين طالع من ذا المسلسلات الإسلامية القديمة) خ
طبعاً لا تدققون على تسلسل الأحداث لأني راجع من اسبوعين والرحلة دامت تقريباً 11 يوم فبصراحة ما أتذكر التسلسل اليومي للأحداث يعني اليوم الأول وش سوينا واليوم الثاني والثالث وغيره....لكن أنا بذكر لكم ايش الأماكن اللي زرتها بكل أمانة وصدق (وين متخرج من كلية ابو الشباب).....والله ماقصر BIG BOSS وداني في ثاني يوم للسي وورلد وماشاء الله عليهم عندهم تنوع غريب في الكائنات البحرية وبالصدفة شفت في أحد الأحواض مخلوق يشبه خوينا الثالث اللي معنا (الحديد) يعرفه saya ganoan وجلست أضحك سبحان الله تشابه غريب بين الإثنين......أكثر ما أعجبني هناك بصراحة الحوض البحري الكبير اللي تمر من تحته....بصراحة خفت وكنت ماسك يد صديقي BIG BOSS قلت يعني لو صار شيء هو بيدافع عني (يسمع يالفزعه) والله لو شفتوني وأنا ماسك يده طالعين كننا عدنان ولينه خ بس أهم شيء انا عدنان..... بعد الجولة الطويلة في السي وورلد طقني الجوع وقلت لخويي BIG BOSS خل ناكل تراني جوعان بالإندونيسي (ماو مكان يا ماس)