السلام عليكم
اسعد الله مسائكم بكل خير
من اكثر من سنه وانا احاول اسافر لمصر
بس الظروف ولا الامواج بتساعد
وصلت لفترة
دبغني فيها الشوق
خلاص لازم اسافر
ومن بعدي الطوفان
ولان مثل ماقلت لكم الوقت بالنسبة لي ضيق جدا
ماقدرت اسافر الا من يوم الاثنين الى يوم الجمعة
سافرت بسعر 1990 ريال
وكانت رحلة من (( اجمل )) رحلاتي لمصر رغم قصر المدة ..
في زيارتي هذه
وبناء على توجيهات مشرفنا العزيز
قمت بزيارة حديقة الاهرام دخول السيارة ب 5 جنيه والتذكرة ب 3 جنيه
حديقة كبيرة وجميلة جدا جدا .. وتستحق الزيارة
تجولنا شوي بالحديقة وفيه مطعم رائع ..
طلبنا عصير وشيء خفيف على انا بنقعد ربع او نصف ساعة بالكثير
لكن والله مضت ثلاث ساعات دون ان نشعر ..
من الاشياء اللي قمت بزيارتها اول مره
مدينة 6 اكتوبر
ودخلت النادي الرياضي ب 6 اكتوبر
صراحة اكثر ماعجبني بالنادي
المسبح
بعد الفرفرة الصغيرة بالنادي .. دخلنا استراحة مكيفة وطلبنا حاجة باردة ..
من بكرة الصباح الساعة 7 تقريبا
رجعنا للنادي علشان المسبح ودي اطب محيفر
لكن للاسف صار فيه تدريب للاشبال لحد الساعة 11
طلعنا ومرينا على اكوا بارك الحديقة المائية
لكن للاسف طلعت بعكس التوقعات _ بالنسبة لي _
مافيها العاب تستحق انك تجلس وتلعب .. وبرضه السعر مبالغ فيه على هالمراجيح اللي فيها ..
اتوقع السعر 40 جنيه ..
زرت مطعم قدوره
وهذي اول زيارة لي للمطعم ..
حلو وجميل ورائع ويستحق الزيارة بعنف ..
والفاتورة طلعت رزحه شوي .. تقريبا 300 جنيه لشخصين ..
طبعا فيه اشياء مفروع من زيارتها
مثل خان الخليلي وشارع الدول العربية والنيل والمراكب والاسواق وبعض الفنادق ..
ودي اسأل عن وضع مصر في رمضان ؟؟
تكون حلوه للسياح ؟؟
لان ان شاء الله بيحصل وقت برمضان للسفر ..