جاكرتا المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
saya ganteng
26-11-2022 - 07:07 pm
تأخرت الطيارة في الرياض أربع ساعات كالعادة جلسنا بالمطار نشوف المغادرين إلى هيثرو و إلى بومبي والي دبي عالم تدخل الصالة بعدنا وتطلع للطيارة قبلنا وحنا ننتظر بوابة 32 تفتح الله من الطفش وها الشغالات الي تصور جنب النافورة والي جنب الكافتريا والي تمشا فالة ها الشعر إذا شفته من ورا تقول ياساتر على هالفتنة ولا تشوف من قدام ؟؟؟؟؟؟؟
ركبنا الطيارة وساعة ما اقلعت ياجماعه ذبحنا الحر خلصونا المهم ربطنا الأحزمة وجلسنا نفتش هاالمجلات_ ما فيه غير وحدة يغيرون غلافة كل مرة والمواضيع فعلا ممتازة للي يبحث عن النوم _
يالله تسع ساعات بالطيارة لكن ما عليه العالم مبسوطة والكابات النسائية الي ملبوسة في مطار الملك خالد سفطت مثل البشوت ووضعت في الشناط أيه ما علينا وزعو الكروت جلسنا نقلبه ما ندري هي إنجليزي وإلا إندونوسي يالله الي جنبه أحد يعرف يعلمه وإلا الله يعينك تترجى المضيفين وتطارد وراهم من مكان إلى مكان ما لكم بالطوالة أعلن المذيع قصدي الملاح عن الهبوط مهب بجاكرتا لالالالالالالالا كالعادة في سنغفورة وإلا في كولا لمبور وساعة بالمطار ترنزيت العالم تصروعت من التعب والطائرة أصبحت مزبلة وأنتم بكرامة - نصيحة الي يحب يدخل دورات المياة في الطائرة عليه أن يدخل في الساعات الأول ولا تقولون ليش ؟؟؟؟؟؟؟_ المهم فتحنا الدرايش وش نشوف أمطار وخضرة و مصائد سمك متناثرة في البحر المهم وقفت الطيارة تزاحمت العالم كل قام الي معه كرتون والي مسجل والي شنطة وتجمعو عند المخارج ربع ساعة افتحو الباب بدت العالم تطلع عاد وأنت طالع تشوف الشراشف والسماعات والملاعق والسكاكين بالسيب سارقاتهن الشغالات امش لك كيلو حتى توصل الجوازات عاد أنت وحضك يوم تمسك سر طوله 100متر حواجز ههه ويوم لا إيه تاصل ويدك على قلبك تشوفهم يرجعون من هاالعالم وما تدري وش السالفة وصلك الدور و قعد يقرق عليك حق الجوازات عطيته المقسوم وإلا طنشت المهم إنك عديت فرحت من هالطلعة و رحت تاخذ شنطك تشوف ها السعوديين عند لهم دكيكين صغير على يسار السير حق الشنط الظاهر إنه يبيع عصير وحاط عليه دسكاون لأنه دايم زحمة . أخذت الشنطة أها جت المشكلة الثانية الجمرك يمكن معك شي ممنوع من المحضورات رز مثلا يالله الله يعينك على الرشوة أو البخشيش علشان تطلع من الصالة أنت طلعت تجيك الكشكات حقت التكاسي والفنادق مالك ومال الغثا خذ فندق من المطار أرخص وأضمن خذه يومين ولا تاخذ تاكسي.
عاد أول ما تطلع الله يعينك على حقين التكاسي مافيه فرق عن محطاة الباص بسوريا بالقوة يبي يركبونك طنشهم وشف فيه مصعد كبير على اليسار اطلع الدور الثاني وخذ لك تاكسي من الزينات بلوبرد طبعا بعد ما تبخشش الشرطي الي واقف .
ما أحب أطول إذا لقيت الموضوع أعجبكم راح أكمل الجزء الثاني وفيه الجدول ويمكن فيه المثير .


رحلتي الى اندونيسيا
التعليقات (9)
Hesham
Hesham
هلا بالحبيب وهلا بوصولك المطار ...
وأنت طالع تشوف الشراشف والسماعات والملاعق والسكاكين بالسيب سارقاتهن الشغالات .... يمكن معك شي ممنوع من المحضورات رز مثلا أي والله أنك صادق كل مره نشوف هالمنظر.. لكن الرز والله مرات يسوي مشاكل لين صار العسكري يبيله كم روبية ...
يالله عساك للقوة وننتظر التكملة ..
تحية وتقدير

majed
majed
مشكور يالسنعوسي على الموضوع ..
وهذا الشي اللي قلته معروف في المطار ... بس بصراحه كله يهون .. أهم شي أنت بتدخل الديره .. لأجل عين تكرم مدينه ..
وتبي الصراحه ...
أتمنى أن تكثر مثل هذه المواضيع .. لأن الواحد يستفيد منها كثير ..
لذلك أتمنى منك أخوي السنعوسي أن تواصل ... وأن يكون هناك تفاصيل أكثر وأكثر ...
مثلا ..
ركبت البلوبيرد .. وفاوضته على السعر .. وطلعتوا للفندق..وأنت في الطريق لاحظت كذا وكذا ..... الخ ..
بصراحه السواليف عن الديره ماينمل منها أبدا ...
ويعطيك العافيه على الموضوع ... وان شاء الله نشوف كل الأعضاء يقومون بكتابة مواضيعهم على شكل قصة ... لأنها ممتعه جدا .. وتعور القلب جدا ... وتوسع الصدر جدا
لذلك أتمنى أن تطول الحلقات ... ولا تتأخر علينا فيها ...
وشكرا ...
أخوك
ماجد

خليل عايش
خليل عايش
الاخ السنعوسي،
لقد تطرق اخونا الى موضوع شيق بدأ يتكرر في مطار جاكرتا من قبل الجمارك و احب ان اعلق عليه
بدأ موظفي الجمارك من مدة ليست ببعيدة من مصادرة بعض المواد الغذائية مثل التمر و الارز و غيرها من المواد التي عادة يحملها العرب
اخواني، حل هذه المشكلة بسيط جدا و هو احمل شنطتين واحدة كبيرة و اخرى حقيبة صغيرة لليد و ضع كل المواد الغذائية في الحقيبة الكبيرة . اما الصغيرة و فضع فيها اي شيء غير مواد غذائية
و سوف تلاحق ان الجمارك في اندونيسيا معنية في تفتيش الحقائب الصغيرة و لن يفتشوا الحقيبة الصغيرة و سوف تمر بسلام دون دفع اي بخشيش
اسال مجرب و لا تسأل حكيم
أخوكم
خليل

Hesham
Hesham
وزيادةً على كلام أخونا خليل ... يوم يشوفون معك كرتون بيفتشونك ... فليكون موادك الغذائية بشنطة أحسن ..

bagus
bagus
والله يالسنعوسي اني حسيت اني راكب معك في الطيارة
وعشت الجو 3 دقايق
وسلم لي على خليل عايش وعلى ما قال المثل اهل مكه ادرى بشعابها ، فعلاً انا دايم احط الارزاق في شنطه كبيره والملابس في شنطه صغيرة
ولا احد من الجمرك راح يفتشك ان شاء الله
وسلامتكم

الكاسب
الكاسب
الأخ السنعوسي بالإنتظار للجزء الثاني
والله يعينك على ماجاك

saya ganteng
saya ganteng
الحقيقة إني عاجز عن الشكر
شكرا لكم أولا .
شكرا على تجاوبكم ثانيا
شكرا على دماثة أخلاقكم ثالثا
وأنا راح أكمل لكن ابحرص إني اعطيكم الحقائق
من أول يوم إلى آخر يوم
حتى مشاكلنا في جاكرتا وأسبابه راح اعرضه في المرات القادمة
لأن الذكرايات حلوة وخصوصا إذا وافقت هوىً في الفؤاد
شكرا لكم أخيرا .

عاشق اندونيسيا
عاشق اندونيسيا
يعطيك العافيه وفي انتظار الجزء الثانى

asddsa55
asddsa55
يعطيك العافه 0000000جميل جدا


خصم يصل إلى 25%